De magar el 2015 el conceyu amenorgó en cuasi un 66% la delda heriedada del anterior mandatu, siendo un de los meyores pagaores del país, ensin que la Oficialidá del asturianu seya torga pa que cuadren les cuentes

0’54 ye’l promediu de díes qu’entarda en pagase les factures dende que se reconoz una delda nel Conceyu Bimenes, pocu más de mediu díe, siendo el cuartu conceyu del país más rápidu en facer los sos pagos. Amás, el conceyu Bimenes vien de presentar la lliquidación del presupuestu 2017, ufriendo un datu más que positivu: a preslle l’exerciciu 2007 hai un remanente positivu d’ayalguería de 112.901,05€, cumpliendo ampliamente l’oxetivu d’estabilidá presupuestaria.

El superávit presupuestariu ye de 99.968,12 y destinaráse a l’amenorgamientu de la delda  financiera qu’esti conceyu caltién con  BANKINTER S.A., colo que s’amortizarán cerca de tres añalidaes n’una.

Aitor García Corte, alcalde de magar l’añu 2015, considera que la recuperación económica del municipiu ye un fechu, pasando de tener una delda de cerca de 900.000€  na anterior llexislatura a 308.000 en menos de tres años -lo qu’implica una redución del 66%-  allugándose pente los cinco conceyos asturianos más rápidos en pagar. Y too ello ensin subir dalu impuestu municipal. Más bien a la contra: nel caberu plenu adoutose por unanimidá l’alcuerdu d’esentar de tasa de llicencia d’obres pa consolidación de cadarma p’aquelles  edificaciones que menacien ruina.

El secretu, dicen dende l’equipu gobiernu, ta nuna xestión eficaz y sobre tou, na redución de gastos. Una lleción pa toos aquellos qu’aporfien nel “coste económicu de la Oficialidá”.

Redaición InfoAsturies

This work is licensed under a Creative Commons Attribution 4.0 International License.