La Coordinadora Ecoloxísta alerta de los pelligros d’un proyeutu de minería del que los vecinos nin siquier fueron avisaos
El Proyeutu d’Investigación Minera Santo Amelia afeuta a 600.000 m2 del conceyu de Cabrales, que sedríen dedicaos a la estración de Cobaltu y otros minerales acomuñaos como’l cromu, níquel, plombu, wolframiu y cinc.
Anque la zona afeutada ye colindante a los mayores núcleos de población de Cabrales, Les Arenes, Poo y Carreña, afeutando a un territoriu ganaderu de gran valor paisaxísticu y turísticu, el “Principado” nun sometió a evaluación d’impautu ambiental nin a información pública’l proyectu.
Na fase de sondeos fondos tamién se veríen afeutaes les agües soterrañes y dellos regatos, como’l de Rondon, la riega de Palellano y afluentes del ríu Casaño.

Según la CEA, la solicitú presentada pola promotora pal permisu d’investigación nun cumple les esixencies yá que nun ye realista col algame ambientalmente alversu de l’actividá propuesta y realiza una interpretación sesgada del principiu de meyores téuniques disponibles p’amenorgar el so efeutu útil. Amás, despliquen dende la Coordinadora, nun desendolca nin concreta l’aplicación de la xestión minera caltenible y de les certificaciones correspondientes, nun describe les carauterístiques biótiques nin se realiza un analís individualizáu de los sondeos, plataformes y accesos. Nun puede considerase completu’l plan de restauración yá que les midíes afitaes son meres intenciones xenerales ensin concreción, ensin que pueda evaluase la so eficacia nin posibilidá de xixilancia y siguimientu afayadizu; nin siquier analiza en detalle los posibles efeutos sobro les especies y hábitats afectos nin sobre les fasteres urbanes.

La evidente perda de valor de les sos propiedaes nel casu de llevase adelantre’l proyectu mineru y de la so fonte d’ingresos pa aquellos que dependan del turismu fai especialmente llamativu’l fechu de que nun se diere a conocer el proyeutu mineru a los vecinos afeutaos, nin per parte del “Principado” nin pol Conceyu.

Nuria Prendes

This work is licensed under a Creative Commons Attribution 4.0 International License.