Güei a los seis y media el colectivu de mayores pola llibertá y los derechos sociales van tar na Plaza 6 d’agostu protestando pola Llei Mordaza

Va trés años aprobóse la Llei de Seguridá Ciudadana, más conocida como “Llei Mordaza” por ser unánimemente considerada una menacia que pa drechos y llibertaes fundamentales, al aumentar el riesgu d’arbitrariedá y, poro, l’efectu disuasoriu que tien al xenerar una gran inseguridá xurídica.

Los GüeliGaites resumen en cinco los motivos polos que la Llei Mordaza nun tuvo d’aprobase nunca; de primeres,da pie a la imposición de multes en casu de protestes pacífiques bonales, lo que va en contra de los estándares internacionales de los drechos humanos y fraya el derechu de xuntanza consagráu nel artículu 21 de la Constitución.

Amás, la Llei Mordaza atrabanca l’exerciciu de formes de protesta totalmente pacífiques, sancionando distintos tipos de protesta pacífica, como les manifestaciones delantre del Parlamentu (con multes d’hasta 30.000 Euros) o la ocupación pacífica d’un edificiu o de les víes públiques. Los Estaos tienen la obligación de garantizar l’exerciciu del derechu a axuntase pacíficamente.

De terceres, pero siendo unu de los puntos más importantes, la Llei Mordaza puede derivar n’impunidá policial, al imponer emportantes multes pol usu non autorizáu d’imaxes o datos personales o profesionales d’autoridaes o miembros de les Fuerces y Cuerpos de Seguridá”. Amás de violar la llibertá d’espresión, puede traer impunidá en casos d’escesivu usu de la fuercia per parte de la policía; nun hai qu’escaecer que, en munchos casos, estes imaxes son la principal preba utilizada nos procesos por malos tratos policiales. Tamién s’imponen sanciones poles faltes de respetu y considerancia nes que’l destinatariu seya un miembru de les “Fuerces y Cuerpos de Seguridá”, lo que torga espresar opiniones crítiques de les actuaciones policiales.

Mientres la tramitación d’esta Llei tamién s’aprofitó pa dotar de respaldu llegal a unes práutiques illegales dafechu pal Drechu internacional, comu son les devoluciones sumaries de persones migrantes dende los puestos fronterizos de Ceuta y Melilla.

Finalmente, nun s’introdució nenguna de les midíes encamentaes poles instituciones internacionales de proteición de los drechos humanos pa erradicar los controles por perfil racial.

Por too ello dediquen esti llunes al sol -y al vientu y a la lluvia- a reclamar l’inmediatu entierru de la llei mordaza.

Redaición InfoAsturies

This work is licensed under a Creative Commons Attribution 4.0 International License.