Entrevista a David M. Rivas sobro la figura del anarquista y pedagogu Eleuterio Quintanilla

Alejandro Fonseca: Siguimos en La Buena Tarde con Monchi Álvarez y yá mos acompanga nos nuesos estudios un asturianu illustre, profesor universitariu, economista, escritor, bon llector, humanista y repunante.

Monchi Álvarez: Repunante de primera división.

A.F.: Pero repunante argumentáu y amigu’l programa, que ata neso ye bona xente. David Rivas, ¿qué tal?, bona tardi.

David M. Rivas: Bona tardi y, como siempres, encantáu de tar con vustedes, pesie ser tan repunante.

M.A.: Cáenmos bien los repunantes.

A.F.: Siempres que seyan repunantes argumentaos, como ye’l casu. Lo que nun mos gusten son los malencaraos y los maltomaos.

D.M.R.: Entós voi aprovechar pa saludar a un vieyu mayestru, tamién repunante, José Antonio Fidalgo.

M.A.: Otru gran repunante, que mos acompanga tolos xueves.

D.M.R.: Por eso lo digo.

A.F.: Vamos dar una vueltina pela historia falando d’un lluchador pola llibertá que yá tuvo acomodu nesti programa na voz del historiador Víctor Guerra. Vamos falar con Rivas d’Eleuterio Quintanilla. Anque tea cais col so nome, la so historia ye poco conocía.

D.M.R.: Ye conveniente falar d’Eleuterio Quintanilla. Si entrugamos a la xente por elli, a cuásique tol mundiu-y suena, riba tóo en Xixón. Igual nel restu d’Asturies menos, pero en Xixón sí suena. Aparte de tener una cai de cierta importancia sobrovive nesa ñebulosa que ye la memoria. Pero sí que ye verdá que ye enforma desconocíu. De fechu, namás qu’hai una biografía completa sobro elli, que ye la de Ramón Álvarez Palomo, yá de los setenta. Nunca se fixera otra. Sí ye verdá qu’apaecen coses ya episodios en llibros colleutivos o de temátiques diverses, sobro la pedagoxía, sobro l’anarquismu, sobro la masonería, como fae l’autor que citaran, Guerra, que lu cita nel so llibru sobro les lloxes de Xixón… Pero nun hai una biografía dempués de la de Ramonín Álvarez. Yo llámolu Ramonín porque lu conociera siendo yo rapacín y asina lu llamaben. ¡Mira tu que llamar Ramonín al titular de pesca del Conseyu Soberanu! Y debería superase esa biografía porque la obra d’Álvarez Palomo ye mui militante. Amás nun ye la obra d’un historiador, sinón la d’un compañeru, ya escrita en tiempos de propaganda y de llucha antifranquista. Necesitamos una historia de Quintanilla cola necesaria distancia. Tamos delantre d’un gran personax pero tamién los grandes personaxes tienen les sos solombres.

M.A.: Empezó a trabayar a los trece años como aprendiz de xocolateru.

D.M.R.: Ñaciera en 1888. Yera fíu del bedel del mercáu de fruta ya hortalices y d’una cigarrera de la fábrica tabacos. Esto quier dicir que, dientro’l proletariáu de la dómina, la so familia taba un poco más acomodada qu’otres, con una renta más alta, pero ye que yeran munchos hermanos, una carrapotada d’ellos. Entamó a estudiar en La Cátedra, una escuela gratuita, y d’elli salió, con trece años, pa trabayar de xocolateru. Elli yá lleva un xerme de conciencia de clas pero ye na xocolatería onde la desendolca y faelo d’una miente peculiar, una forma que lu lleva a entender la llucha de clases tamién peculiarmente. El patronu que tien anímalu a que siga estudiando y aídalu a ello, con horarios flexibles, adelantándoi perres ya otres coses, porque ve qu’aquel neñu tien capacidá pa ser más qu’un peón del xocolate. Entóncenes Quintanilla estudia nel Atenéu Obreru. Ya equí tamién tien unes predilecciones llamatives. Nun había programes ríxidos, caro, nun yera una enseñanza reglao, ya elli, además de a la xeografía, la historia y la filosofía, dedica munchu esfuerzu a daprender idiomes. Estudia inglés, francés, italiano y, por supuesto, esperanto. Eso va dai una amplia visión del mundiu. Col tiempu, la figura d’aquel patronu que-y permitiera facer lo que fixo llévalu a un conceutu de la llucha de clases un tanto rellativizada. Eso llévalu a pertenecer a esi grupu d’anarquistes que yeran homes bonos, los santos llaicos, como Anselmo Lorenzo, Fermín Salvochea, Elisée Reclus… En Xixón yá tiníen una santa llaica como Rosario d’Acuña, masona y vinculada al Atenéu Obreru pero que nun yera anarquista.

A.F.: Una historia de quien empieza a trabayar mui xoven, colos güeyos de güei, caro. Entós la vida entamaba antes y tamién terminaba enantes. Qu’un neñu de trece años trabayare nun yera raro, pero ye que tampoco yera lo que güei consideramos un neñu.

D.M.R.: Cuando Quintanilla entra a trabayar con trece años nuna xocolatería yá nun hai neños de diez nes mines de carbón, pero una década o dos enantes había neños de diez años de guah.es n’Asturies y n’Inglaterra.

A.F.: ¿Cómo discurren esos años dende qu’empieza a trabayar y nos que va averándose a un sindicalismu cuásique inesistente?

D.M.R.: Nun yera tan inesistente. Los socialistes yá cuntaben cola UXT, que se fundara a finales del XIX y n’Asturies tinía gran presencia nel carbón y na siderometalurxia, pero non nos puertos nin na industria de consumu. Pela so banda, los obreros que bebíen del anarquismu nun tiníen sindicatu. Tiníen sociedaes de sofitu y grupos d’acción. Por esa manera d’actuar, con grupos más de base y más horizontales, tarden muncho en tener un sindicatu. La CNT nun se funda ata l’añu 10 ya’l primer congresu tienlu nel 11. Y, precisamente, Quintanilla representa a los 1.500 anarcosindicalistes de Xixón y de La Felguera nel congresu de 1911. L’anarquismu asturianu concéntrase en Xixón, nel puertu y na industria de consumu, anque tamién nos fornos altos. Lo de La Felguera ye llamativo: una islla anarquista nun océanu socialista. La vida industrial de La Felguera xiraba alrodiu d’una única empresa y d’una única organización de solidaridá, con un gran pesu rural na rodolada. Tamién yeran anarcosindicalistes Candás, siempres vinculada a Xixón, y los demás puertos importantes, como As Figueiras, Navia, L.luarca o Cuideiru. Non Avilés, non, que yera socialista. Polo tanto vemos a Quintanilla como ún de los fundaores de la CNT. Y va a pertenecer siempres al grupu que considera fundamental la unidá d’acción cola UXT. Nel fondu, ye de los que pretendíen recomponer la Primera Internacional que Marx y Engels destruyeran. Esi plantegamientu, que va caltener tola vida, va siguilu ún de los sos discípulos más rellumantes: García Rua. Años dempués, Rua plantega la unidá sindical nel esiliu, años sesenta, ya inclusive tres la muerte de Franco. Pero, evidentemente, tóo yera estremao y la unidá yera dafechamente imposible. El casu ye que trabaya en facer sindicatu nos años diez y ehí tien el so bautismu fuéu. Los años diez n’Asturies son mui convulsos, riba tóo en Xixón, Hai fuelgues cada dos por tres, cierres patronales cada dos por tres, lo qu’entós se llamaba lock out, atentaos, tiroteos na cai… Mio güelu, que yera de la CNT y discípulu de Quintanilla na Escuela Neutra, contáramelo munches vegaes: asesinatos d’esquiroles, rempuestes de los pistoleros patronales, atentaos contra empresarios, atracos y asaltos… El de más sonadía fora l’asesinatu nos retretes públicos de la plazuela San Miguel de Lantero, el propietariu d’una gran maderera. Dalgunos entá se recordarán que nel entamu de l’autopista, saliendo de L’Humedal, a la mandrecha, tuvo Maderes Lantero ata hai trenta años. El casu ye que detienen a Quintanilla nuna d’estes xornaes y lu lleven a El Coto, nun sé si a la cárcele o al cuartel. Ellí dan-y tal paliza que pierde’l conocimientu durante hores. Cuando eso se sabe españa la solidaridá, non namás que na ciudá, sinón qu’en toa Asturies. Ata nel parllamentu piden desplicaciones al gobiernu dos diputaos: el socialista Pablo Iglesias ya’l lliberal Melquiades Álvarez. L’impautu que causa na población, non namás nel proletariáu, y nel mesmu congresu los diputaos el maltratu a un home como Quintanilla, un home fonderamente antiviolentu, fuera tremendu. A los represores gubernativos saliérais el tiru pela culata.

M.A.: Cuando llega la dictadura de Primo de Rivera paez que Quintanilla retírase de l’actividá sindical y dedícase namás qu’a la enseñanza.

D.M.R.: La dictadura de Primo de Rivera ye seguramente la etapa más escura d’Eleuterio Quintanilla. Elli ye un anarquista un tanto peculiar. Dempués prestaríame falar de la peculiaridá, en xeneral, del anarquismu asturianu. Quintanilla plantegó dende siempres la unidá colos socialistes, cola UXT concretamente. Pero’l casu ye que la UXT apautara con Primo de Rivera. Largo Caballero taba nel Conseyu d’Estáu y Manuel Llaneza yera l’home de la dictadura-UXT n’Asturies, con tola fuerza’l SOMA detrás. Yo supongo, repítolo, supongo, qu’eso a Quintanilla debió llevalu a una situación perdifícile. Nun quería dar patrás na so consideración de la necesidá d’un pautu cola UXT pero tampoco podía defender lo que la UXT taba faciendo. Quintanilla ve como la UXT gobierna con Primo de Rivera mientres los llocales de la CNT son derribaos por pieces d’artillería. Esto ye testual, non una llicencia lliteraria. Quintanilla, por un principiu de prudencia qu’otros consideraríen de llerza o inclusive de traición, ta calláu. Tengan en cuenta que dientro la CNT tamién había tendencies ya engarradielles a fartafarta, que diben ser mui dures un poco dempués, nos años de la república.

M.A.: Tol mundiu apautó con Primo de Rivera. La dictablanda la llamaben. Yo nun sé si yera tan blanda.

D.M.R.: Realmente la dictablanda fueran los gobiernos d’Aznar y de Berenguer, que sustitueron a Primo de Rivera nun últimu intentu de salvar la monarquía. De blandu el xeneral, nada. Agora bien, nun yera un fascista. Tamames tien un llibru sobro esa dómina del que yo coñozo perbién la xénesis y la conclusión. Como ye de sabío, teo una gran rellación con Tamames, bon amigu ya ún de los mios mayestros. El llibru ta mui bien y yá nel títulu desplica la so tesis. Entítulase Los años de la dictadura y pon como subtítulu Nin Mussolini nin Franco. Yo creyo que Primo de Rivera ye un espadón del XIX, con un puntu de rexeneracionismu, bastante anticlerical y con ganes de modernizar, que fae un pronunciamientu decimonónicu y non tanto un güelpe d’estáu. Na mio opinión el golpista de verdá ye Alfonso XIII. Primo de Rivera morriera probe en París ya’l rei morriera ricu na Roma de Mussolini.

A.F.: Dicía, profesor Rivas, que tiníamos falar del anarquismu particular d’Asturies o d’Eleuterio Quintanilla como un anarquista particular.

D.M.R.: L’anarquismu tien varies corrientes. Tien una corriente nihilista, mui rusa, que ye la que da orix a la táutica de los atentaos polos atentaos, a parte de la base teórica de lo que llamaron propaganda pol fechu. Yo nun duldio de que los que fixeron los grandes atentaos que conocemos del XIX y del XX foran anarquistes, non, pero cuásique tóos tienen una base nihilista. D’esi anarquismu bebe, en parte, Bakunin, anque Bakunin nun ye un nihilista, por supuesto que non. Bakunin ye un dialéuticu y, como tal, parte de la idega pa más llueu posar na realidá. Y, con frecuencia, cuando tienes una idega’l mundiu enantes de conocer el mundiu, acabes con una idega falsa de la realidá, nuna ideoloxía nel peor sen hegelianu. La otra llínia ye la de Kropotkin. Ye un positivista: primero analiza la realidá y d’ehí saca les consecuencies y la cosmovisión. Frente al anarquismu deductivista, dialécticu, l’anarquismu inductivista, positivu.

M.A.: A vusté esto del inductivismu gustái un poco más…

D.M.R.: Yo soi bastante kropotkinianu.

M.A.: Sabíamoslo, sabíamoslo…

D.M.R.: L’anarquismu mediterrániu, el de Malatesta y Fabbri n’Italia, los Urales en Cataluña… ye mui bakuninista. Andalucía ye otra cosa. Lo d’Andalucía ye un anarquismu de probes, qu’enllaza con movimientos rurales baxomedievales, que llucha pola mera supervivencia física, escontra señoritos feudales, un tanto primitivista, delles vegaes enteverao con sociedaes secretes que yá salen na lliteratura’l sieclu d’oru, mui violentu dalgunes vegaes pero ensín planificación denguna… En fin, que nun ye lo mesmo l’anarquismu de los xornaleros qu’el del proletariáu formáu nos ateneos y nes escueles racionalistes de Bilbao, Barcelona, Xixón o Vigo. Nesti contestu, l’anarquismu qu’entra n’Asturies ye’l de Kropotkin, porque entra más sero. Ente Bakunin y Kropokin hai cincuenta años. Ya entra, fundamentalmente, col pa mín principal teóricu anarquista español, que ye Ricardo Mella. Tamos falando d’un home de la clas alta ya illustrada de Vigo, el centru lliberal de Galicia, una ciudá que siempres tuvo paralelismu con Xixón, lo mesmo que Bilbao. Mella ye topógrafu y llega a Asturies como altu téunicu del ferrocarril Xixón-Llangréu.

M.A.: Y collaboró con Eleuterio Quintanilla.

D.M.R.: Quintanilla ye más mozu y sabía de la obra de Mella. Va al so alcuentru y funden los dos el primer xornal anarquista d’Asturies, Acción Libertaria, editáu en Xixón ata’l final de la guerra. Volviera a editase, como selmanal, nos años setenta, precisamente embaxo la direición d’Álvarez Palomo. ¿Qué caracteriza a Mella y a Quintanilla? Pues que piensen que l’anarquismu, amás de tener idegues clares, tien que ser, cuando seya mester, pragmáticu. Quintanilla escríbelo clariquino: “ponderación, realismu, moderación”. Ye l’anarquismu de freba kropotkiniana. Hai un exemplu mui apropiáu. Cuando españa la gran guerra, la CNT, siguiendo la llínia bakuninista, declárase neutral y, declara que, nel casu de qu’el reinu d’España entre en guerra, llamará a la fuelga xeneral revolucionaria. Consideraben que la guerra yera cosa de burgueses peleando por mercaos y de proletarios sangrando y morriendo nos campos de batalla. Nun-yos faltaba razón, ¿eh? Kropotkin defiende la causa de los alliaos y pide que los obreros y los campesinos nun se metan n’aventures pretendidamente revolucionaries y que defiendan los llogros de la illustración y les llibertaes republicanes. Eso mesmo proclamen n’Asturies Mella y Quintanilla. Eso da una idega de les contradicciones y disensiones qu’había ente los anarquistes. Por cierto, cuando’l referédum sobro la OTAN, ochenta años dempués, la CNT careciera d’una cris asemeyada. Eso llevaríamos a la idega de que los anarquistes asturianos yeran moderaos y pactistes. Pue que lo fueren, pero n’ochobre de 1934 foron los únicos que salieron a les cais coles armes nes manes. Yeran munches les contradicciones y, evidentemente, Quintanilla participara de munches d’elles.

A.F.: ¿Vusté almira a Eleuterio Quintanilla pol so llabor docente, pola so vida de llucha, pola so visión del anarquismu y cómo la espardiera per Asturies? ¿Qué ye lo que lu acerca a esti personax?

D.M.R.: Quintanilla ye ún d’esos personaxes que, asigún pasa’l tiempu, van revalorizando. Lo malo nesti casu ye que Quintanilla nun tien muncha obra escrita y cuásique toa en periódicos. Tien dos o tres coses feches nel exiliu, más de recuerdos y reflexones que d’un trabayu teóricu o analíticu potente, sacantes La tesis sindicalista, de 1931. Sí alcontramos esa teorización nel so compañeru y mayestru, Ricardo Mella. Mella tien un llibru lluminosu entituláu Ideariu, ya otros como La llei del númberu, Diferencies ente’l comunismu ya’l collectivismu, La nueva utopía o La reacción na revolución. Mella si ye un teóricu de fustax. Pero Quintanilla ye fundamental na enseñanza y na pedagoxía y, de xuru, si la historia fuere otra, güei taríamos falando d’otru Quintanilla, muncho más importante y con más cais n’Asturies y fuera d’Asturies. Quintanilla vien de tres tradiciones pedagóxiques. Una ye la francesa de Reclus, la escuela xeográficohistórica; otra ye la barcelonesa de Ferrer, la escuela racionalista; ya otra la rusa que vien de Tolstoi, la de la Yasnaia Poliana, la escuela moralista. Elli bebe de les tres, nun teo mui claro cuála-y pesa más, anque pamidea que ye la de Reclus. Tamién tien una influencia de Stirner, anque tien un poco de prevención al descomanáu individualimu d’esti autor. D’esta combinación de tradiciones Quintanilla saca una conclusión metodolóxica que ye de total actualidá: elli creye que la escuela tién que dar enseñanza pero non educación. Esi ye’l fundamentu de la escuela neutra, el neutralismu escolar, que dirixe bastantes años ya onde tamién trabaya Ricardo Mella, ente otros. La idega ye que nun tien d’haber una escuela anarquista, nin una escuela socialista, nin una escuela masónica, como tampoco una escuela católica. Quintanilla piensa que la escuela tien que dar instrumentos y conocimientos pa que los individuos seyan a entender la realidá y, dempués d’analizar y pescanciar, qu’ellos adouten la ideoloxía o la visión global que-yos pete. Esa ye una discusión de plena actualidá. La educación ta na familia, nel entornu inmediatu, mientres que la escuela forma intellectualmente. Yo nun educo a los mios alumnos. Yo trato de daprendé-ys una ciencia ya unes téuniques qu’ellos aplicarán dempués con mayor o peor fortuna. La gran crisis de la escuela vien en parte porque les families delegaron nella la educación y desixen a la escuela lo que la escuela nun puede dar. Hai un exemplu mui claru d’esi neutralismu: un mayestru dai a un estudiante los instrumentos pa qu’entienda la naturaleza, la bioloxía, pongamos por casu. Esi rapaz sal de la escuela cola teoría de la evolución embaxo’l brazu, un instrumentu válidu pa entender la bioloxía. Si esi home ye creyente, pues que lo seya, y si mañana se-y presenten contradicciones, pues que les resuelva. Tamién dicen los neutralistes que los estudiantes nun tienen por qué salir de la escuela siendo anarquistes. Si lleguen a pensar que l’anarquismu ye la idega que meyor combina colos sos conocimientos y les sos esmolecimientos, pues mui bien. Ehí detrás ta la obra positivista del príncipe Kropotkin. Ye verdá que de la escuela de Quintanilla salieran anarquistes y masones en gran númberu, pero por una razón básica: pol exemplu de los sos mayestros, esos que nun los forzaren nunca a una visión ideolóxica del mundiu.

M.A.: Tamos nos años diez y venti. Lleguen los años trenta y la república. ¿Cuálu ye’l papel de Quintanilla durante la república, el papel del masón Quintanilla, que diríen dalgunos?

D.M.R.: Vamos dexar pa dempués lo de la masonería. Quintanilla nun xuega un papel importante durante la república ata un episodiu mui interesante del que falaremos que tien llugar yá en 1937. Quedándomos n’Asturies y nel anarquismu, Quintanilla nun va tener la importancia d’un Avelino González Mallada, alcalde de Xixón, o un José María Martínez, dirixente de la revolución y muertu en combate. Propunxéron-y ser ministru nel gobiernu de Largo Caballero y rechazó l’ofrecimientu. Nun ta claro por qué tomara esa decisión. Hai quien diz que tinía antipatía a Largo dende lo del directoriu de Primo de Rivera y hai quien diz que nun-y prestaba nada dir a Madrid. Puede ser cualisquiera d’eses causes, o les dos o denguna d’elles. La de nun querer marchar ye probable porque más lluéu aceutó un cargu menos importante nel Conseyu Soberanu. Quintanilla inclusive llega a escribir qu’el modelu políticu y económicu español podría aconseyar a Asturies a asumir les mesmes postures que Cataluña y Vasconia. Estos estremos Álvarez Palomo nun los aclara nel so llibru. Yo voi aventurar una hipótesis que puede nun responder a la realidá pero que cabe nun home como Quintanilla. A los intellectuales, riba tóo a los intellectuales con una gran carga ética, cuéstá-yos muncho dar pasos políticos. Y Quintanilla yá ye un home mayor pa la época, tien más de cincuenta años. En política xuégase delles vegaes al marxe de la verdá, el fín frecuentemente xustifica los medios, ya especialmente nuna guerra civil o nel carel d’entrar nella. Eso pa un home que tola vida trató d’actuar conforme a la ética, a la ética de Spinoza n’últimu términu, ye un pasu difícil. Per otra banda, elli siempres fora de la llínia pactista de la CNT pero cuando Pestaña funda’l Partíu Sindicalista y se provoca la gran ruptura del anarcosindicalismu, queda na CNT, anque siempres intentando la reunificación. Eso daría llugar a una vieya llínia qu’entamó col trentismu durante la república, siguiera col cincopuntismu nel exiliu y acabara cola escisión de la CXT yá nos ochenta. El casu ye qu’ente toes estes razones, combinaes como seya, Quintanilla decidiera nun participar nel gobiernu republicanu. Ya equí entramos notra d’eses paradoxes d’esti movimientu que, seguramente, ye paradóxicu dende la dómina de Proudhon: el pactista kropotkinianu Quintanilla renuncia a ser ministru y los ortodoxos bakuninistes Montseny y García Oliver asumen les carteres de sanidá y de xusticia respeutivamente. En fin, ante la historia y ante los anarquistes sedrá Federica Montseny quien tendrá que dar desplicaciones, que les tien y son bastantes, pero, dende lluéu, non Eleuterio Quintanilla.

M.A.: Vamos tocar agora l’asuntu de la masonería. ¿Cómo influí la masonería en Quintanilla y qué papel xuega esti home na masonería?

D.M.R.: L’actividá masónica de Quintanilla nun fue mui importante, si entendemos esto como trabayu nes lloxes, pero tien importancia si miramos al pesu que los principios masónicos tienen nel so comportamientu como docente y como militante. Ingresa na lloxa Xovellanos, la más prestixosa de Xixón ya una de les más actives d’entóncenes y ta nella unos venti años. Pero nun va muncho, colo qu’incumplía compromisos, y acaben echándolu por falta pagu.

M.A.: Eso pasome a min dalgunes vegaes, non colos masones pero sí notros sitios.

D.M.R.: Debió de pasamos a tóos dalguna vuelta qu’otra. El casu ye que la orde tién, pesie a tóo, una gran influencia en Quintanilla. En primer llugar, como dicía, influí na so visión pedagóxica. Hai tener en cuenta que tolos que inspiren a Quintanilla fueran francmasones: Reclus, Ferrer, Stirner, Tolstoi, Mella, el mesmu Krpotkin, tamién Bakunin… Quintanilla llega a la masonería con munchos principios masónicos yá incorporaos al so ideariu y dientro reafírmalos y toma unos cuantos más. Pero tamién hai una custión política: naquella lloxa xixoniega coinciden personaxes d’ideoloxíes estremaes, anque la mayoría yeran homes de les distintes families lliberales y nun hai fascistes nin comunistes, dos corrientes fonderamente antimasóniques. Por exemplu: codu con codu tan sentaos nes teníes Eleuterio Quintanilla y Melquiades Álvarez. Aunque cuando la detención de Quintanilla seguramente qu’Álvarez actuaríe igual nel casu de ser otra persona, la so contundencia nes cortes tamién tinía un motivu más: yeren hermanos masones y de la mesma lloxa. A min lo que más me prestaría saber ye de qué falaben estos dos homes, non tanto de temes masónicos, sinón de les custiones diaries de la política, la economía, la sociedá… ¿De qué falaríen nes cenes non ritualístiques? Y, una entruga más, ¿dalgún alcuerdu adoutaron en dalguna ocasión?

A.F.: ¡Qué pena que daquella nun hubiere teléfonos móviles ya otros cachivaches d’esos…!

D.M.R.: Otru illustre masón del anarquismu, anterior a Quintanilla, fue Anselmo Lorenzo. Na so lloxa propónen-y que faiga una plancha, que ye una especie de discursu en xíriga masónica, desplicando cómo se puede ser masón y anarquista. Al mesmu tiempu, los anarquistes píden-y lo mesmo. Tamos a finales del XIX, en plena llucha de clases yá non namái qu’oculta sinón que bien visible y la masonería yera una institución básicamente burguesa y les organizaciones anarquistes básicamente obreres y campesines, proletaries. L’interés o la preocupación pol asuntu tan más que xustificaos. Lorenzo cumple coles dos peticiones pero sólo conocemos ún de los documentos. Juan Gómez Casas, creo que nel so llibru La Internacional n’España, recueye’l discursu dau delantre los anarquistes, pero la plancha masónica, si ye que se conserva, ta en paraderu desconocíu. Si pudiéramos comparar les dos argumentaciones sedríamos a entender a estes figures, en principio tan sosprendentes, y, ente elles, a Quintanilla.

M.A.: Segunda república, güelpe d’estáu que deriva nuna guerra civil, Asturies en guerra… ¿En qué senda alcontramos a Eleuterio Quintanilla?

D.M.R.: Dempués de refugar ser ministru nun va tener dengún cargu d’importancia. La guerra, amás, dexa a un lláu a la xente que, como Quintanilla, yá ye mayor y que nin ta n’alministración nin tampoco tien conocimientos militares, y que, llóxicamente, nun ta pa dir al frente. Pero aceuta en setiembre de 1937 el nomamientu pol Conseyu Soberanu como director del Tesoru Artísticu d’Asturies y Santander, cola misión de treslladar a Francia tolo que se pudiere, nuna operación asemeyada a la de la custodia de les obres del Prado de Madrid. Ya ye tando nesti cargu cuando tien llugar la Operación Santina. Lo d’Operación Santina ye’l nome que-y doi yo, ¿eh?, porque nunca entóncenes naide-y lu diera. Ye la historia de cómo la virxe de Cuadonga sal de la cueva y acaba en París, una historia na qu’ún de los capítulos principales protagonízalu Eleuterio Quintanilla.

M.A.: ¿Qué llevaron a la Santina a París?, ¿d’incógnito, nuna maleta…?

D.M.R.: Sí, sí, metía nun paquete. La historia, por facelo en curtio pue resumise con cuatru brochazos. Cuando estalla la guerra danse episodios na zona republicana de quema de ilesies, saqueos y profanaciones, destrucción d’imaxes y coses d’esi tenor. En Cangues d’Onís, un mélicu d’Izquierda Republicana que se llama Luis Laredo, atiende al esmolecimientu de la so muyer, Ángeles, una muyer católica, que ta perpreocupada por si la Santina puede sufrir dalgún ataque. Laredo decide sacar a la virxe de la cueva y la escuende nun armariu del hotel Pelayo, ellí mesmo, en Cuadonga. Ya entós piensa en a quién-y cuenta lo qu’hai nesi armariu col fin de que lu custodie.

M.A.: Osía, que la Santina salió del armariu.

D.M.R.: Mire, eso nun lo pensare yo. Yá sabía que Monchi Álvarez dalguna armaba.

A.F.: Ye una mente retorcía.

D.M.R.: Pa que lluéu diga, como l’otru día, que los gordos yeren bonancibles.

M.A.: Siga, David Rivas, cola Operación Santina.

D.M.R.: Laredo alcuentra una alliada nuna neña de Mocedaes Socialistes, Marina, que ye fía de Xulio’l de los Ingleses, llamáu asina porque taba especializáu na mecánica de coches ingleses. Marina garra a unos cuantos camaraes y, armaos de fusiles, custodien día ya nuechi aquel armariu. Cae Santander ya’l problema ye’l contrariu: cuerren rumores de que los tabores de marroquinos pretenden cañonear Cuadonga. Esti estremu nunca se pudo probar y seguramente forma parte de la lleenda negra de los moros, que nun yera nueva na guerra civil sinón que yá venía de cuando la d’África. Laredo llama a Belarmino Tomás, presidente del Conseyu Soberanu, y espon-y’l probleme. Por cierto, si dalguién pretendía cañonear Cuadonga, la suerte tuvo de parte porque les tropes mandábales Solchaga, un carlista catolicón, y non un falanxista poco relixosu, de los qu’había unos cuantos. El presidente, un socialista, ordena treslladar la Santina a Xixón, ya’l conseyeru Ambou, comunista, firma un decretu pol qu’ordena pasar peles armes inmediatamente al que toque la imax. La Santina entra en Xixón custodiada por milicies de la FAI. Ya equí entra en xuegu Quintanilla, por ser responsable de los tesoros artísticos d’Asturies. Monten una esposición nel Atenéu Obreru conforme a un proyeutu de Xovellanos. L’illustráu tinía la idega de llevar a la Santina per Asturies ya esponela en llugares públicos, ilesies polo xeneral, xunta tolo que yera la historia del reinu asturianu. Quien supervisa la esposición ye Quintanilla. Cuando Xixón ta a puntu de caer el gobiernu decide marchar pa Barcelona y llevar consigo a la Santina. Ya ye Quintanilla, como responsable de les ayalgues, quien, nun paquete atáu al cuerpu, la saca nun barcu dende El Musel. Pero, por avatares de la navegación y del viax posterior per tierra, la virxe nun llega a Barcelona sinón a Francia y llévenla a la embaxada española en París.

M.A.: Daquella nun echaba naide monedes.

D.M.R.: Non, non, eso ye propio del pozu la fortuna de les verbenes de pueblu.

M.A.: Yo cuando nun teo suelto paso per Cuadonga.

D.M.R.: Bucea un poco y ¡hala…!

A.F.: ¿Cómo acaba la Operación Santina?

D.M.R.: Cuando acaba la guerra empiecen los saqueos, ente ellos el de la embaxada, provocaos por criminales aprovechaos y por xente normal que busca lo que seya pa escapar y poder sobrovivir. Entóncenes un comunista de la zona de les cuenques mineres que tien bona relación con un claretianu diz-y al cura que la Santina ta na embaxada y qu’elli nun quier que-y faigan mal. D’alcuerdo los dos, meten el paquete nun falsu techu de la caxa l’ascensor. Cuando la llegación de Franco ocupa l’edificiu, el claretianu va ver al embaxador nuéu y diz-y ónde ta la Santina. Abrieron el paquete y nun faltaba nin una sola piedra preciosa.

M.A.: ¡Vaya historia! Da pa una película, Operación Santina… A ver si la TPA s’anima.

A.F.: ¿Quién pensare qu’una imax tan importante pal catolicismu tuviere nun armariu d’un hotel y que fixere esi viax?

D.M.R.: Lo que reflexa mui bien esta historia ye lo que signifiquen los símbolos. Un miembru d’Izquierda Republicana, que seguramente sedría llaicista, una neña socialista, un presidente tamién socialista, un conseyeru comunista, un teóricu anarquista y masón, ya un mineru comunista salven a la Santina de la desapaición. Eso da una idega mui clara de lo que ye’l principiu d’identidá subyacente, se politice o nun se politice. Debe haber poques histories nel mundiu que tean estos protagonistas al rodiu, en definitiva, d’una diosa madre que reside nel somatu la tierra.

A.F.: Acaba la guerra y Quintanilla queda en Francia. ¿Qué fae nos años siguientes?

D.M.R.: Enantes participara en Barcelona na comisión que trabaya na evacuación de neños y, en cayendo la ciudá, pasa a Francia. Trabaya en 1943 nun batallón nel Loira, onde escribe un llibru mui emotivu, Emocionariu del destierru. Al acabar la guerra marcha pa Burdeos, onde sigui escribiendo na prensa anarquista asiduamente y muerre en 1966. Por cierto, yo conocí a una ñeta suya que vivía en Xixón y que yera amiga de mio madre. Hai menos de dos años cumpliéronse los cincuenta años de la muerte y naide, sacantes la CNT y l’Atenéu Obreru, se recordaron d’ello.

M.A.: Nesti programa falamos de Quintanilla.

D.M.R.: Nun lo sabía pero nun m’estraña d’esti programa.

A.F.: Munches gracies, David Rivas, pol so tiempu y por, como siempres, les sos informaciones, los sos analises ya esi criteriu de los que piensen bien y alto.

D.M.R.: Gracies a vustedes. Fue un placer.

This work is licensed under a Creative Commons Attribution 4.0 International License.