El xueves 5 de xunetu entama la tercer edición d’El Festival del Cosmos n’Asturies, Splashdown, na so sede de Llaboral Ciudá de la Cultura de Xixón
Un eventu únicu sobro la esploración espacial, que nun se trata namás d’un ciclu de conferencies y de talleres práuticos sinón qu’amás, nesta tercer edición, cuenta con un espectáculu de música ya imaxes en directu a diariu, una ‘performance’ de ciencia aplicao sobro los futuros viaxes a Marte, la proyeición de cine d’un clásicu de la ciencia fición y l’emisión especial en direutu de Gravedá Cero, el programa radiofónicu de la Radio del Principáu d’Asturies (RPA) puramente dedicáu a la esploración espacial.
Dientro les novedaes más llamatives d’esta edición ta la incorporación al programa del Splashdown Kids, esploradores espaciales, un eventu a manera de ‘campus’ que va escurrir en paralelu con diverses actividaes destinaes pa reciella y mocedá. D’esta forma, el Splashdown ta convirtiéndose adulces nuna cita imprescindible nel panorama de la divulgación de les ciencies espaciales nel nuesu país.
Amás de diversos collaboradores que se van sumando dende distintos seutores profesionales y científicos, el Splashdown Festival 2018 vuelve cuntar col sofitu del organismu públicu Xixón Convention Bureau, del centru Llaboral Ciudá de la Cultura y de la FECYT del Ministeriu d’Economía, Industria y Competitividá.
Redaición InfoAsturies
This work is licensed under a Creative Commons Attribution 4.0 International License.
