L’Audiencia refuga presllar el casu d’El Musel por ver nél nicios de criminalidad nos que taríen implicaos fasta 24 responsables de la obra, acusaos de prevaricación, marafundiu y fraude
Cuando nel añu 2008 Andecha Ástur presentó la denuncia por esos delitos énte la Oficina contra’l Fraude na Xunión Europea, la OLAF, la redolada política asturiana nun se tomó en serio l’acusación y los medios de comunicación nun  fixeron ecu de la que, como se ta viendo agora, yera una trama delictiva d’importancia.
Diez años dempués d’interpuesta esta denuncia, la maxistrada de l’Audiencia Nacional qu’instrúi’l casu dicta un autu que propón l’apertura de xuiciu oral por prevaricación y fraude contra 24 responsables de la obra d’ampliación d’El Musel, refugando’l sobreseimientu del casu en reparando nicios racionales de criminalidá.
La llista de los direutivos empresariales y altos funcionarios implicaos inclúi a Fernando Palao, exsecretario d’Estáu; Mariano Navas, espresidente de Puertos del Estáu; Fernando Menéndez Rexach, espresidente d’El Musel; el so esdireutor José Luis Díaz Rato y tamién a José María Alcoba Arce, abogáu del Estáu y l’esalcalde de Carreño, Manuel Ángel Riego González, amás d’a tolos responsables de les empreses que sacaron adelantre los trabayos.

Nuria Prendes

This work is licensed under a Creative Commons Attribution 4.0 International License.