Asturies carez una duple discriminación nel repartu de fondos: el vinu Cangas recibe cero euros y la sidre nun se contempla en denguna estaya

El Ministeriu d’Agricultura, Pesca y Alimentación vien d’anunciar el repartu de los sofitos destinaos a la produción vitivinícola y la promoción del vinu en mercaos de terceros países “cola fin de contribuyir a la meyora de la so posición competitiva y a la so consodilación, o nel so casu a l’apertura de nueos mercaos”.

En total, alcordóse l’asignación de 49.999.665 euros que se repartirán pente 1.071 programes a desendolcar nel 2.019, de los que se beneficiarán toles “CCAA” menos tres. Xunto con Asturies, les “comunidaes” que nun recibirán nin un euru son Cantabria ya Islles Baleares, pesi a qué les tres cuenten con vinu con Denomación d’Orixe.

El vinu d’Asturies, el de Cangas, garró puxu enforma nes caberes décades, meyoró la so calidá y presentación y algamó pali que pali un merecíu puestu na gastronomía’l país, recibiendo premios a nivel internacional nos concursos de vinos d’alta montaña. Sicasí, sigui ñegándose-y el correspondiente sofitu económicu y un añu más recibirá cero euros, frente a los más de siete millones que recibirá’l vinu vascu, el más beneficiáu por esta midía.

Na otra man, dientro de les bébores alcooliques de baxa gradación procedentes de la fermentación de fruta, la sidre, siendo un de los productos agroalimentarios de mayor importancia n’Asturies, nin siquier se contempla dientro de los presupuestos del Ministeriu d’Agricultura, Pesca y alimentación.

Llucía F. Marqués

This work is licensed under a Creative Commons Attribution 4.0 International License.