Los prexubilaos de la minería perderán un treinta por cientu de los sos ingresos al pasar a la xubilación

Les xeneroses prexubilaciones mineres coles que se mercó’l fin, nos años noventa, de la movilización social que s’oponía al preslle de les mines, van aportando a la so fin. Nos prósimos cincu años a la práutica totalidá de los prexubilaos del seutor quitarán-y la “pre” a la so paga, un amiestu que yos valía pente siete mil y catorce mil euros anuales y que dexarán de percibir a cortu plazu.

La gravedá d’esta redución de perceiciones estriba nel fechu de que, ante’l desmantelamientu de les cuenques, en xeneral, ya en concreto del seutor mineru, les pagues de los antiguos trabayaores de la mina son el sustentu económicu principal de bona parte de la población.

Esta baxada d’ingresos coincide nel tiempu col preslle definitivu de los caberos pozos d’Hunosa, un finxu hestóricu qu’acaba con una forma de vida y col que foi un de los seutores económicos y sociales más puxantes del país y que sicasí ta pasando desapercibíu. La suma d’estos dos fechos dexa abierto la duda de cuál sedrá la salida económica pa los moraores de les cuenques nos prósimos años. La hostelería ya’l turismu, seutores onde’l nivel de precariedá llaboral ye ablucante y xeneralizáu, ye fasta agora la única solución propuesta.

Por supuestu, a la xente de les cuenques asturianes siempre yos quedará emigrar.

Llucía F. Marqués

This work is licensed under a Creative Commons Attribution 4.0 International License.