Comu plan alternativu, el domingu cellebraráse nel Muséu’l Pueblu d’Asturies la Folixa pola Paz, na que pente talleres, conciertos, sidre y xuegos se reclamará l’asignación de los gastos militares a fines sociales y la fin d’esta esibición militar, contaminante, tremendamente costosa y que dexa nel aire ciertu tastu a menacia

La ciodá tornará a paralizase esti domingu, cola añal esibición de potencia bélica nel que l’exércitu español protagonizará una demostración de fuercia, gastu inxustificáu y contaminación -acústica y atmosférica-  pa una masa acrítica, que mirará embaecía pal cielu, ensin aparase a camentar cual ye la vraera finalidá de la maquinaria de guerra que tien enriba

El Festival aéreu Internacional tornará a traer a Xixón decenes de máquines de guerra, amosando “la cara amable” d’unos aparatos diseñaos pa matar eficientemente, guiaos por persones entrenaes precisamente pa eso. Un grotescu actu d’autobombu español y militarista con un tresfondu menaciante y macabru nel que muerte y arruelu van de la man.

Amás la Rula de la ciudá acoyerá una selmana entera la muestra “Volar, historia de una aventura”, una esposición con nome de película Disney y conteníu militarizante nel que repasarán la historia l’Exércitiu l’Aire, maxinamos que saltando la parte na qu’esi mesmu exércitu bombardea brutalmente Xixón.

El Festival Aéreu cuenta con un presupuestu desconocíu, apurríu por istituciones públiques y privaes, que tienen comu envís la normalización pente la población d’estes máquines de matar, utilizaes en multitú de conflictos bélicos en tolos puntos del planeta para finar con vides humanes y afitar los porgüeyos del sistema, herederes de los mesmos aviones españoles y alemanes que sobrevolaron y bombardearon Xixón, pente otres poblaciones asturianes.

Por tou ello, la oposición de los xixoneses a esta esibición lleva años faciéndose patente y son abondes les organizaciones, asociaciones y partíos que pidin que se ponga fin a esti despropósitu; pero por agora namás pueden esperar que’l Nuberu eche un gabitu y les condiciones metereolóxiques suspendan l’actuación.

Llucía F. Marqués

This work is licensed under a Creative Commons Attribution 4.0 International License.