La programación cultural del Festival Arcu Atlánticu, que va cellébrase en Xixón del 24 al 29 de xunetu prósimos, abre esti añu los sos escenarios a la mocedá creativo de les naciones que componen esti espaciu xeográficu y cultural

Mañana entama’l festival que rinde homenaxe a los nuesos raigaños Atlánticos, buscando aquello que nos venceya colos nuesos pueblos hermanos: hestoria, arte, música, gastronomía, vezos… la so identidá xunitaria, dalgo que ye pernecesario reconocer pa siguir costruyendo un espaciu común de convivencia y desendolcu.
Si nel 2017 el nesu foron les llingües, esti añu los protagonistes sedrá la creatividá y los mozos y moces d’estos países.

La mocedá encara anguaño necesidaes y problemes nuevos no que cinca al so futuru llaboral y económicu, a la so formación o a les formes de comunicación y participación social. Mientres el festival van dase a conocer proyeutos ya iniciatives emprendedores y proyeutos de desendolque col envís d’aumentar l’intercambiu d’esperiencies y l’afitamientu de víes nueves de comunicación pente entidaes, mocedá y coleutivos de los estremaos puntos d’orixe, creando una rede social na qu’afincar un futuru común.

Les actividaes tarán agrupaes en sectores de creación ya empobinaes a la xente mozo: lliteratura y edición, diseñu gráficu, comunicación, música, nueves teunoloxíes, diseñu, moda ya imaxe sedrán dalgunes de les industries culturales nes que se pondrá l’acentu estos díis. Una rempuesta bien creativa y anovadora que s’ufre a la conocencia pública nun contestu de folixa y vagar.

Redaición InfoAsturies

This work is licensed under a Creative Commons Attribution 4.0 International License.