Una encuesta realizada por Electomanía en collaboración cola CTXT, amuesa que’l sofitu a la monarquía pente los asturianos cai perbaxo’l 48%

Históricamente’l CIS (Centru d’Investigaciones Sociolóxiques) realizaba una encuesta añal sobro la valoración de la monarquía española, daqué que camudó en 2015 cuando la istitución s’asitiaba en cifres bien negatives tres l’españíu del casu Noos. Dende esi momentu poques encuestaores entrugaron sobro la so valoración d’esti asuntu, siendo nesti casu Electomanía quien decidió a llevar alantre esti estudiu, que finalizó esti mesmu mes
Los resultaos amuesen que, anque la monarquía sigue siendo la opción preferida polos españoles, sobremanera nes dos Castillas onde’l sofitu ye del 60%, pierde encontu respeutu años anteriores. Pente los asturianos, nun hai dulda: el 52% declárase partidariu d’una república.

Por edaes, los menores de 35 años son los que lo tienen más nidio, entantu que los mayores de 55 son los que más dulden a la d’acabar cola monarquía parlamentaria española.
El consensu ye entá mayor cuando son entrugaos sobre’l so sofitu a la convocatoria d’un referéndum para decidir el modelu de Xefatura del Estáu: más de siete de cada diez asturianos amuésense partidarios de realizar una consulta darréu.
El mapa ye revelador. Asturies, Galicia, Cataluña, País Vascu, Valencia, Navarra, la Rioja y les islles, tanto Baleares como Canaries, refuguen la monarquía española, frente a Castiella y Llión, Castiella-La Mancha, Madrid, Estremadura, Murcia, Andalucía, Cantabria, Aragón y les ciudaes autónomes de Ceuta y Melilla, que son les comunidaes más monárquiques, apostando pola continuidá de la monarquía parlamentaria.

Nuria Prendes

This work is licensed under a Creative Commons Attribution 4.0 International License.