La oficina d’información turística, Infoxixón, incorporó nel mes de xunetu dos aplicaciones de realidá virtual que simulen una visita a un llagar y a una mina pa dar a conocer al visitante la Ruta de la Sidra Xixón o el patrimoniu industrial de la ciudá ya’l país

Dende’l 25 de xunu pasáu, los turistes que s’averaron a la oficina d’información turística allugada nel Puertu Deportivu, Infoxixón, pudieron visitar virtualmente un llagar o adientrase nuna mina. Y eso ensin salir de la mesma oficina.

Estes visites foron posibles al traviés de dos aplicaciones de realidá virtual desendolcaes pola firma xixonesa Artline Solutions y que sirven pa promocionar, per un llau, la Ruta de la Sidra Xixón y la posibilidá de visitar los llagares del conceyu y, pel otru, el bayurosu patrimoniu industrial d’Asturies, que’l turista pue conocer con dellos descuentos incluyíos na Xixón Card, la tarxeta turística de la ciudá.

Estes aplicaciones tuvieron gran aceptación ente los turistes, sobre manera ente los más pequeños. Más de 400 visitantes pudieron esfrutar d’esta nueva aniciativa que s’enmarca dientro’l Programa de Destín Turísticu Intelixente, nel que s’encamienta a incorporar teunoloxíes nueves pa la promoción ya información al turista.

Nun ye la primer vegada que Xixón Turismo inclúi la realidá virtual nos sos aiciones promocionales. El simulador de la mina afitóse nel pabellón del Conceyu de Xixón na edición cabera de la Feria Internacional de Muestres d’Asturies y l’aplicación que simula una visita a un llagar emplegóse nuna aición promocional na estación d’Atocha y nun alcuentru con blogueros, tamién en Madrid.

Dambes dos aplicaciones van incorporase en delles aiciones de promoción de la ciudá como destín turísticu.

Redaición InfoAsturies

This work is licensed under a Creative Commons Attribution 4.0 International License.