Faciendo un analís detalláu de los datos rexistraos na última Encuesta de Población Activa (EPA) -aquella que llama tantu l’atención esti trimestre pola práutica unanimidá nel sen positivu, tocantes a creación y calidá d’emplegu- y en valorando yá’l primer impautu negativu, relativu a la desemeyanza ente la meyora en númberu d’ocupaos nel caberu añu n’Asturies y n’España, ye quiciabes el momentu de parase a analizar ¿Qué ta pasando n’ Asturies?
Entamemos revisando otra vegada esti gráficu. Recueye un panorama escepcionalmente optimista, llamando l’atención lo qu’asocede cola cabera barra de datos.
La qu’apunta en dirección contraria al restu ye Asturies.Los únicos que destruyeron emplegu nos postreros dolce meses, en concretu 6.700 ocupaos menos nun añu. Retrotrayiéndonos un pocu más atopamos un datu entá más espeluznante: Güei trabayen en Asturies 65.000 persones menos (un 14%) qu’en 2008. Y sigue baxando.
Nes caberas décades son miles los mozos y moces asturianos que tuvieron d’emigrar pola falta d’oportunidaes llaborales, decenes de miles añalmente nuna continua sangría poblacional que se lleva, principalmente, a los más preparaos. Persabemos que nun se quieren dir, pero quedase n’Asturies na actual coxuntura desixe, en munchos casos, un auténticu actu de fe y ser bien cosciente del valor que cada asturianu qu’aguanta na so tierra tien pal país.
Nun se van por que quieran, vánse énte la falta d’oportunidaes llaborales. Y nun ye una quexa ensin xacíu. Los datos de la EPA confírmenlo.
Ye importante tener en cuenta -y esti ye un datu que se tiende a escaecer- que nun se trata d’un enclín que naciera cola crisis. Asturies caltien un diferencial de 8-10 puntos tocantes a tasa d’actividá respecto al estáu español dende va décades.
Centrándonos nos datos d’emplegu actual, Asturies ta a lo cabero del mercáu llaboral ente la población adulta, teniendo por detrás solo a Andalucía y Estremadura onde, magar el so altu nivel de paru, ta esperimentándose una progresión positiva.
No que cinca a la tasa d’actividá de los mayores de 16 años, vemos qu’Asturies ye onde menor porcentaxe de la población adulta tien un emplegu o ta buscándolu.
Ocho puntos menos que la media estatal y casi 4,5 puntos menos que la vecina Cantabria, en teoría con una repartida poblacional y económicu similar.
Amás de tou eso, d’Asturies destaca non solo la escasez de trabayu, sinon la so precariedá, l’altu nivel de dependencia de los emplegos públicos (más del 80%) y l’alarmante datu del envieyecimientu de la población activa.
Nun podemos escaecer que tamos falando d’una nación hestóricamente rica, con recursos abondos y que nun fai tanto yera una de les más prósperes y dinámiques del estáu, con un texíu empresarial puxante, competitivu y diversificáu. Denguna condición oxetiva desplica el desaniciu económicu y llaboral d’Asturies nes caberes décades.
Entá anguañu Asturies destaca por cuntar con una población con una formación perriba la media, con un eleváu porcentaxe de titulaos universitarios y de téunicos de nivel mediu-altu, recursos, bones infraestructures -magar la so decadencia- y dellos centros urbanos bien estremaos y coneutaos pente sí, ello ye, el conxuntu de carauterístiques que davezu definiríen una zona próspera con bones mires de futuru.
Merez la pena entrugase qué pasó nes caberes décades, si hai nello dalguna intencionalidá esterna y como podemos faer los asturianos pa salir d’este bucle.
Llucía F. Marqués
This work is licensed under a Creative Commons Attribution 4.0 International License.
