Los entomólogos alerten del xabaz descensu na población de saltapraos n’Asturies. Estos artrópodos nun son los únicos insectos qu’escaseen: los cocos de lluz, los grillos, les parafuses y fasta les caparines xúnense a esta disminución de la fauna
Un estudiu surdíu de la collaboración pente la Xunión Europea y la Xunión Internacional pa la Conservación de la Natura (UICN), destaca que cuasi un terciu de les especies d’ortópteros evaluaes (saltapraos, grillos y bacallories, pente otros) tan menaciaes, dalgunes en pelligru d’estinción.
Non solo n’Asturies: la Sociedá Entomolóxica de Krefeld, n’Alemania, costata que la biomasa d’insectos amenorgóse na so fastera un 80% desde 1989, datos asemeyaos a los recoyíos, por exemplu, en Galicia; en Catalunya, tres cuartes partes de les especies de caparina tan en pelligru.
La tresformación y destrución del Hábitat ye señalada en tolos estudios como la cabezalera causa de desaniciu. L’usu descomanáu d’insecticides, los incendios, la contaminación, la canalización de rios son lletales pa estos animales. Tamién el cambiu climáticu contribui, los científicos citen, pente otros problemes, l’alteración de los períodos de sincronía pente la floración de les plantes y la eclosión de los insectos.
El catálogu nacional d’especies menaciaes inclui namás 90 especies d’invertebraos, de los que 35 son insectos y solo 17 (ocho vulnerables y nueve en pelligru d’estinción) tienen una categoría que permite activar planes de recuperación. La Comunidá Virtual d’Entomoloxía estima’n 38.311 el númberu d’especies d’insectos na Península Ibérica. Dientro d’Asturies los entomólogos proponen el reconocimientu de más de 50 especies como vulnerables y 23 en pelligru d’estinción.
Sinón por empatía animal, esto debería esmolecer al ser humanu na so parte más egoista: alrodiu del 84% de los cultivos pal consumu humanu precisen d’insectos pa la so polinización. Les consecuencies d’esti desaniciu sobre les redes trófiques que sustenten los ecosistemas, tamién los agrarios, ganaeros y forestales, pueden ser fatales.
Llucía F. Marqués
This work is licensed under a Creative Commons Attribution 4.0 International License.
