Énte les recientes declaraciones del Conseyeru d’educación, retardando la recuperación de les condiciones anteriores a la crisis pa los profesores asturianos al cursu 19/20, el sindicatu d’enseñantes SUATEA emitió un comunicáu reclamando la recuperación de los drechos llaborales de los docentes darréu
L’impautu de la política de retayos sobro la escuela pública ye sobradamente conocíu. Cuando nel añu 2012 s’espublizare’l Real Decretu sobro la racionalización del gastu públicu, qu’implicaba l’aumentu de les hores lleutives pal profesoráu -nun entamu da manera estraordinaria y temporal- xeneróse una situación que llevó al profesoráu a una situación llende, complicada esti cursu col desendolcu del procesu selectivu.
A pesar de que n’otros puntos del estáu español esta situación foi revirtiéndose y los profesores recuperaron el so drechu ensin torgues, el gobiernu asturianu sigui apelando al “respetu a la llegalidá” pa nun resolver la situación y siguir desixendo’l másimu a el profesores.
La noticia de que la primer Conferencia Sectorial d’Educación dio lluz verdi a les comunidaes autónomes pa revertir los retayos aplicaos fasta agora fixo allugar esperances del fin d’esta carga llaboral estra non retribuida, polo que los sindicatos d’enseñantes amosáronse sosprendíos al costatar que la Conseyería d’Educación asturiana tramitó yá les instrucciones pal entamu del cursu 2018-2019, calteniendo les hores lectives ensin cambéu dalgunu “amosando un despreciu absolutu escontra’l so profesoráu”.
Coles mesmes, Genaro Alonso Mejido, Conseyeru, dexó entever que que nun ta pol fin de los retayos aplicaos, sinón por abrir negociaciones colos sindicatos educativos pa buscar situaciones entemedies o plazos indefiníos, señalando que “nun va ser fácil volver al estatus horariu d’antes de la crisis”.
Dende SUATEA consideren que se trata d’una situación d’hipocresía y despreciu.

“Echamos en falta una voluntá p’aplicar esta nueva situación darréu porque yá nun hai escuses que xustifiquen la situación de cursos anteriores y, si l’actual equipu nun se ve con fuercies, igual llegó’l momentu de dise y dexar pasu a otru nuevu más sensible a la situación de la escuela y los pruyimientos del profesoráu” declararon.

Redaición InfoAsturies

This work is licensed under a Creative Commons Attribution 4.0 International License.