Llucía F. Marqués
La reflexón de güei vien de la man de la descarbonización, el preslle les térmiques, el fin de la minería asturiana y la xusticia.
Cuando na mesma situación y condiciones a un individuu (persona, sociedá, país) se-y aplica un tratamientu desemeyáu qu’a otru, por muncho que se sofite esti tratamientu en razones xustificaes y argumentos válidos, dase un casu d’inxusticia, o cuando menos de discriminación.
Vamos partir entos de la premisa de que los motivos pa presllar la minería asturiana son válidos: el carbón foriatu ye más baratu, el mercáu manda y la teoría de la ventaxa comparativa postulada por David Ricardo va dos sieglos demuestra que los países tienden a especializase namás na produción y esportación d’aquellos bienes que fabriquen con un coste relativamente más baxu respeuto al restu’l mundiu, importando aquellos que se producen nel propiu país con costes comparativamente más altos que n’otru llugar. Ergo tendremos de presllar les mines si producir carbón n’Asturies ye más caro que facelo en países onde la man d’obra ye más barato y les midíes de seguridá innecesaries -nun vamos a entrar a valorar la rentabilidá social nin la ética d’esta teoría-. Bien, merquemos carbón fuera d’Asturies. Pero l’aceite marroquí ye muncho más barato que l’español ¿por qué nun aplicamos la mesma vara y acabamos cola produción d’aceite d’oliva n’España?. La empresa testil catalana nun tien na que facer a la hora de competir en costes cola de la India ¿daquién se plantega desmantelala?. Nun hai comparanza pente los costes africanos y valencianos de produción de naranxa, asina qu’arrasemos col campu español, nun ye competitivu. Ah, ¿Qué non? ¿Qué equí nun podemos aplicar eses teories y hai que caltener les produciones pola so rentabilidá social y la so importancia estratéxica, económica, tradicional y tolo que quieras?. Nun cuadra.
Sigamos. La enerxía térmica ye contaminante; cierto. Hai que curiar el mediu ambiente y finar coles actividaes que prevoquen altos niveles d’emisiones tósiques; d’alcuerdu. Hai que presllar entós la produción enerxética asturiana, caiga quien caiga nello, n’ares d’un bien mayor. Nun vamos discutilo. Pero nun quedemos ehí, apliquemos el mesmu argumentu a la enerxía nuclear, a les refineríes de petroliu, les industries contaminantes, a los vuelos, a los coches de combustible fósil…
O toos o dengún. Porque sinón tará faciéndose una discriminación contra lo asturiano y eso, cenciellamente, nun ye admisible. Nun ye xusto.
This work is licensed under a Creative Commons Attribution 4.0 International License.
