Ufrióse una detallada amuesa de les diferencies ente les gaites de les naciones celtes del norte la Península, Asturies ya Galiza, y Javier Menéndez ganó’l XXXIII Troféu Mac Crimmon
Pocos son a madrugar nún llugar talu comu An Oriant demientres el so Festival Intercélticu, qu’algama esti añu na menos que la so 48 edición. Poro, Asturies aportó fuerti a Breizh (Bretaña), entamando’l díi con una clas maxistral a cargu del xoven Jesús Fernández González, etnomusicólogu y gaiteru, y el gallegu Pepe Vaamonde, mayestru de gaita gallega en Vigo.
N’ella, Jesús desplicó los aspeutos más téunicos del instrumentu de nueso, tocando también temes hestóricos comu la so evolución d’instrumentu solista al dúo de gaita y tambor o les bandes de gaites comu puntu más reciente. Les mises con gaita foron un fechu hestóricu que desplicó’l musicólogu y que sosprendió al públicu. Tamién desplicáronse los floreos comu métodu d’axuste d’afinación y muestra de virtuosismu, ya tamién réplica del melisma de la tonada. Asinamesmo, pudieron esfrutase muestres de los ritmos principales del cancioneru asturianu.
Ta nidio que güei ye un bon díi pa la gaita asturiana n’An Oriant, dau que Javier Menéndez, representante asturianu, alzóse comu venceor del XXXIII Troféu Mac Crimmon. Dende equí, la nosa norabona tantu al ganaor comu a los participantes. Queda por ver si la nuesa delegación podrá tornar con tolos premios que prometen llevase. Tamos ciertos que dexarán bien altu’l llistón
This work is licensed under a Creative Commons Attribution 4.0 International License.
