Estremaos coleutivos, convocaos poles Asamblees de Trabayadores en Llucha, protagonizaron una concentración pa visibilizar los sos conflictos, coincidiendo col actu oficial d’inauguración de la Feria d’Amueses
Con esta convocatoria quixeron poner en primer llínea los problemes qu’aquexen agora mesmu al nuesu país: el paru y la precariedá, los ERES, los despidos y los zarros d’empreses, los desfiucios, la mocedá sometida a los salarios de miseria y a la emigración forciada, les pensiones que nun dan pa vivir, les privatizaciones y los retayos sociales y, sobremanera, aporfiaron, pa “ faer visible l’Asturies que nun se resigna y llucha polos drechos llaborales y sociales de la clas obrera”.
Nesta ocasión, destacóse la represión contra la protesta llaboral: el despidu de la trabayadora de Duro Felguera, la persecución a los compañeros de Vauste per parte del fondu utre Quantum Capital, l’acoso al voceru de el trabayadores de Burger King en Xixón, el procesamientu a los solidarios del Hotel Reconquista….
Nel actu fixéronse presentes les persones afeutaes polos desahucios en La Camocha, les reivindicaciones llaborales na TPA, les persones estafaes por IDENTAL, delles agrupaciones de pensionistes, y dellos coleutivos de mocedá.
Escucháronse tamién eslóganes contra la non derogación de la reforma llaboral y la llei mordaza per parte del nuevu gobiernu d’España.

Llucía F. Marqués

This work is licensed under a Creative Commons Attribution 4.0 International License.