Cuasi l’un por cientu de los trabayaores asturianos por cuenta propia pidin baxa llaboral cada añu, un altu porcentaxe d’ellos por problemes d’ansiedá y depresión
Un informe de la Federación d’Asociaciones de Trabayaores Autonomos en 2017 espeya que’l 0’96% pidieron baxa llaboral. Esta cifra ta perbaxo del porcentaxe que pidieron baxa pente los trabayaores contrataos, de los que’l 1’95 dexaron de trabayar temporalmente por enfermedá, pero les baxes de los autónomos son por motivos más graves, durando de media el triple que les de los asalariaos, 92 díes.
Pa un trabayaor autónomu la baxa tien consecuencies muncho más graves que pa ún por cuenta ayena: una baxa llarga puede arruinar por completo un pequeñu negociu. 395 euros ye la cantidá cola que suelen sobrevivir los trabayaores por cuenta propia que pasen por una baxa llarga.
Ún de los principales motivos de baxa son les alteraciones de la salú mental -basicamente ansiedá y depresión- anguañu la segunda causa de baxa llaboral n’Asturies y con previsión, acordies la OMS, de que pasen a ser la primera en dos años. La inestabilidá económica, la precariedá y les escases perspeutives de meyora económica del país influyen ensin dubia na salú mental de los asturianos.
Llucía F. Marqués
This work is licensed under a Creative Commons Attribution 4.0 International License.
