Ayeri espublizóse nel Bopa el Protocolu d’actuación n’episodios de contaminación del aire del “Principado” ensin qu’incorpore meyores sustanciales nel control de les empreses
Pesi a les continues emisiones y alertes per contaminación, col espoxigue de les enfermedaes respiratories y neurolóxiques asociaes y teniendo una menacia de sanción per parte de la Comisión de Mediu Ambiente de la Xunión Europea, el nuevu Protocolu nun recueye nenguna de les midíes propuestes pola Coordinadora Ecoloxista d’Asturies que podríen ameyorar esta situación.
Los ecoloxistes destaquen que’l protocolu ta desautorizáu dende’l so puntu de partida, una y bones los datos que se van tener en cuenta pa considerar un episodiu de contaminación del aire van ser puramente los procedentes de les estaciones públiques del “Principado”, estratéxicamente allugaos nos puntos de baxa polución y que nun cubren el territoriu nacional, dexando a conceyos ensin nengún tipu de xixilancia oficial, como ye’l casu de Gozón, Corvera, Carreño, Tinéu, Navia y Morcín. Van inorar los datos de la rede d’estaciones de los Conceyos, Empreses y Puertos, que permitiríen una recoyida d’información de manera más eficiente y veraz.
Tampoco van tenese en cuenta los datos relativos a la contaminación por bencenu, pesi a ser Uviéu’l puntu de la Península con mayor concentración d’esti peligrosu contaminante.
Los niveles d’activación del protocolu, per otra parte, van ser especialmente tolerantes y superiores de fechu a los propuestos pola OMS pa protexer la salú humana. Nun s’inclúin estratexes d’información y alerta pa picos de contaminación esceicional, nos que s’avise de manera eficiente a la población pa que les persones más sensibles puedan tomar les midíes oportunes, convirtiendo les alertes más nuna fonte d’información a posteriori que nuna ferramienta cola que prevenir o amenorgar la esposición a les toxines cuando tan presentes.
Dende la CEA llamenten que nun se tuvieren en cuenta les allegaciones presentaes por ellos y polos afeutaos de la contaminación “que van tener que siguir careciendo la contaminación cola complicidá del Principado que la encubre y antroxa de normalidá”
Redaición InfoAsturies
This work is licensed under a Creative Commons Attribution 4.0 International License.
