La suma de los conceyales de los 4 partíos políticos que llevaron pancarta al manifestamientu antitaurín sedría abondo pa finar coles corrides de toros en Xixón
Más de dos mil persones participaron ayeri na protesta, entamada por Anadel, col sofitu d’otres 18 organizaciones, en protesta pola celebración en Xixón de la Feria de Begoña. El manifestamientu trescurrió con normalidá dica la llegada a la Plaza el Bibio ya’l alcuentru colos aficionaos qu’acudíen a ver la “fiesta española” y que crearon momentos de tensión, con intercambiu de voces ya insultos.
Pente les abondes pancartes, cabe destacar les de cuatro partíos políticos que, seique nun convocaren, acudieron a la semeya: PSOE, Xixón si Puede, IU y Equo. El trabayu conxuntu de los conceyales d’esos cuatro grupos sedría abondo pa finar cola feria, pa lo que nun sedría preciso nin siquiera prohibir les corrides, nin convocar referéndum pa ello, como propusieron dende Xixón Si Puede. La retirada de la subvención municipal cola qu’añalmente se financia esta feria, polo demás non rentable, valdría pa desaniciala finar con ella, lo mesmo que la retirada de la concesión de la Plaza’l Bibio, de titularidá municipal.
Nel día de mayor llenu, con cartel de lluxu, la Feria de Begoña nun algamó llenar los ¾ de la plaza, dexando cerca de 4.000 entraes en taquilla, pesi a regalar dellos cientos d’elles y pesi a los autocares d’aficionaos veníos dende fuera d’Asturies.
El presupuestu pa financiar esta actividá sal en bona midía de les arques municipales.
Llucía F. Marqués
This work is licensed under a Creative Commons Attribution 4.0 International License.
