Les cifres de pesca de salmones y truches nesta temporada de pesca vuelven ser llacerioses. A la presencia d’especies alóctones, como la carpa y el cámbaru americanu, súmase’l problema del furtivismu, cola falta control de práctiques illegales como la vienta de salmones selvaxes
L’actual normativa de pesca vixente prohibe la comercialización de cualquier especie piscícola, con esceición de los exemplares procedentes de los centros de acuicultura debidamente autorizaos, lo que nun torga que mientres tola campaña de pesca, asociaciones de restoranes y d’hostelería, asina comu delles sociedaes de pescadores reconozan que más del 50% -les sociedaes de pescadores alcen esti porcentaxe al 80%- de los salmones pescaos n’Asturies vendense de manera illegal a la hostelería.
Tantu la Conseyería de Fomentu del “Principado”como la Conseyería de Sanidá y l’Axencia de Sanidá Ambiental y Consumu informen de que nun tienen conocencia de dengún tipu de comerciu ilícitu de salmones selvaxes de los nuesos ríos, esto ye, estes práutiques nin s’escuerren nin se sancionen.
Los salmones nun son los únicos afeutaos por esti problema: truches y reos son tamién oxetu d’esta práutica illegal qu’imposibilita el control de captures, col grave impautu que supón para’l caltenimientu d’estes especies ca vegada más menaciaes nos ríos.
Amás de poner en serio riesgu’l caltenimientu d’estos pexes, hai que tener en cuenta de que son vendíos ensin dengún tipu de control sanitariu.
Llucía F. Marqués
This work is licensed under a Creative Commons Attribution 4.0 International License.
