Subir antroxaos pela carretera y baxar descomanaes carroces per un ríu dudosamente navegable, reclamando agua y una sopera al ritmu del Chalaneru: una folixa con toques surrealistes que namás puede vese nel Nalón
Más de mediu sieglu dende qu’a un garrapiellu rapazos que veníen de ver el Descensu’l Seya yos dio por antroxase y baxar el Río Nalón asonsañando piragües col únicu envís de facer comedia y rise un pocu. Cuarenta y cuatro años dende que’l primer grupu de muyeres decidieron qu’elles tamién queríen pásalo bien rio abaxo, por muncho que dalgún torciere’l focicu y les llamare Guxarapones… de fechu, adoutaron esi nome qu’enta caltienen. Pali que pali foron amestándose otros pueblos, como Villoria que baxo’l so primer añu un carru’l País y qu’entá sigue participando, o el de Tolivia, con embarcaciones especialmente ambicioses,ya’l Descensu’l Nalón entamó a ser una fecha ineludible.
De magar entos tolos años hebio quien siguiere la tradición, seique dalgunes ediciones la participación fore mínima, non comu la d’esti sábadu, cuando s’espera una participación masiva na que ye la 51 edición d’esta peculiar folixa.
L’envís esportivu ye desplazáu equí pol folixeru y d’avezu tamién pola crítica risondera d’actualidá. Ya nun se trata d’aportar los primeros p’algamar un troféu (qu’había que devolver cada añu, yera siempres el mesmu) sinon que los participantes lluchen por importantes premios, siendo La Sopera (y la soperina pa la reciella) la más naguada, asonsañu polesu de la ensaladera de la Copa Davis.
El xuráu nun valorará velocidá, sinon vestuariu, carroza, como aporta al final del río, el xaréu ya’l númberu de participantes, puntuando tamién la temática asturiana. Sicasí, pa la mayoría de los miles de folixeros que ya tan preparándose pa mañana, el premiu ye’l Descensu en si mesmu, porque como dicen nel Documental fechu por mor del 50 Cabudañu, “El descensu nun ye pa velu, ye pa vivilu”. Y si llueve, que llueva.
Llucía F. Marqués
This work is licensed under a Creative Commons Attribution 4.0 International License.
