La so esperiencia en rescate d’animales varaos y  de la basoria que yos prevocó la muerte y la qu’alcontraron dientro de munchos d’ellos -les necropsies espeyen qu’esi foi el motivu de la muerte de bona parte de los animales qu’aportaron a les costes, con hasta siete kilos de plásticu nel so interior- ye clave pa ser coscientes de la situación que viven los nuesos mares, una problemática que’n Cepesma conocen bien tres de 20 años coordinando la rede de varamientos  d’Asturies.

Namás na costa asturiana hai tres grandes concentraciones de plásticu, la más grande na vertical d’Otur. Nes sableres de Sabugo y  Otur, hai una zona que, por sinerxies de les corrientes, rexistra una concentración tremenda de plásticu que termina incluso metío en cueves del fondo. Tenemos otros 16 o 17 puntos nos que ye fácil alcontrar al bucear cantidaes descomanaes de basoria.

Dientro la so campaña llama l’atención l’actividá “Toos comemos plásticu”, na qu’alerta del altu nivel de contaminación de les agües asturianes, alvirtiendo que, seique nun s’aprecien nin los metales pesaos nin los compuestos plásticos inxerios peles especies marines, estos acaben nes nueses meses.

Otra de les actividaes de la campaña entitúlase “El plásticu mata” y nella afonden na composición química de los plásticos, un conxuntu de más de 135 componentes, la mayoría altamente tósicos, colos que se puede relacionar incluso enfermedaes autoinmunes o neurodexeneratives comu l’Alzheimer y munches otres relacionaes cola pérdida de memoria.

Redaición InfoAsturies