Dellos miembros de la Corriente Sindical d’Izquierdes (CSI) lleven dies acampaos frente a la sede de Vauste Spain en Xixón, como protesta pola suspensión  d’emplegu y sueldu a siete de los sos trabayaores más comprometios cola llucha pol futuru de la empresa

Dende la inclusión de la planta de Tenneco en Xixón en Vauste Spain les actuaciones contra los sindicalistes son tan avezaes que, según la CSI “pola so continuidá, nun pueden tratase como fechos aisllaos, sinon como parte d’una estratexa definía y desendolcada pola direición de la empresa escontra la seición sindical de la Corriente”, el sindicatu más votáu na empresa.

CSI lleva tiempu denunciando, pente otros incumplimientos, que namás 7 meses tres de la fin del contratu robláu pola empresa con Tenneco, dexarán de fabricase amortiguadores na planta de Xixón, ensin que dengún otru de los proyeutos anunciaos pol fondu utre ten en camín d’avanzar, lo que fae albidrar un futuru dificil a los trabayaores de la fábrica.

De magar estes denuncies de la CSI n’Inspeición de Trabayu, en mayu de 2017 un altu direutivu de Quantum Capital Iberia, propietaria de Vauste, califica de yihadistes a los miembros de la CSI y comparalos col terrorista suicida de Manchester, a lo que CSI respuende con una denuncia contra l’executivu que deriva nuna riestra d’actuaciones, unes públiques y otres, según relata’l sindicatu, amparaes nel anonimatu, contra los delegaos y afiliaos de CSI.

Estroces  en bienes personales, como coches de los trabayaores, taquilles y material de sindicatu, robos, acusaciones infundaes, mensaxes vexatorios en tablones d’anuncies… son dalgunes de les agresiones que vienen denunciando miembros de la CSI, ensin que’l restu los sindicatos que formen parte del comité d’empresa se solidaricen frente a estes agresiones, sinon reacionando más bien en contra, queriendo torgá-y el drechu a entamar movilizaciones pol futuru de la planta de Xixón.

La cabera agresión ye la suspensión d’emplegu y sueldu de cinco emplegaos mientres siete dies y posteriormente otra sanción de 30 díes contra’l secretariu de la CSI ya’l delegáu de la sección sindical.

Tolos sancionaos yeren miembros de la CSI y destacaben por tar implicaos na denuncia de toos estos fechos.

Como protesta por estes sanciones y pola querella criminal interpuesta contra ellos por Fernando Sanz Negrillo (Direutor de Vauste Spain), que pidi penes de 1 a 4 años de prisión, tarán acampaos delantre la factoría mientres los 30 díes que dura de la sanción (del 20 d’agostu al 18 de setiembre). Amás, en protesta, fadrán cortes de carretera delantre la fábrica.

Llucía F. Marqués

This work is licensed under a Creative Commons Attribution 4.0 International License.

• TagsAcampadacsiVausteXixón