Na intervención política Marcos Fernández reclamó la República Asturiana como una continuidá hestórica d’aquella declaración de 1937 y como “únicu sistema que garantiza la llibertá, democracia y progresu d’esti pueblu”, llamando  a la participación na movilización del Díi de la Nación Asturiana escontra la presencia de la monarquía española en Cuadonga, perafitando que “¡Asturies nun tien rei!”

La xornada entamó a primer hora de la mañá col ascensu a les trincheres de L’Abiduriu y la visita a la casamata defensiva de Tarna, continuando con un sentíu homenaxe floral acompangáu de la intervención política, na que los presentes se reivindicaron comu los descendientes de los protagonistes de la Declaración de Soberanía.

“Somos los nietos y bisnietos d’aquellos homes y muyeres, y como ellos tamién tenemos un proyeutu de recostruición nacional y social, y como ellos, sabremos tar al altor de les circustancies y avanzar nesa República Asturiana que seya garantía de democracia, de respetu a los drechos individuales y colleutivos, y l’apueste de futuru d’esti país d’homes y muyeres llibres, d’un pueblu soberanu del que formamos parte y qu’alita ente nós”

Tamién se denunció’l silenciamientu de la hestoria d’Asturies, acusando a los mesmos partíos y sindicatos que llevaron a Asturies a esta declaración son agora títeres de Madrid “avergoñaos d’Asturies y de la so hestoria, ensin más proyeutu qu’obedecer a lo que-yos manden ya intentar medrar”, recalcando la so responsabilidá na falsa transición del franquismu a la monarquía borbónica y la imposición del “Principado” ya’l estatutu que carecemos.

La xornada reivindicativa tuvo marcada pola importante participación llionesa remembrando lo que tamién ye parte de la so hestoria ya que, anantes de ser integraos pola fuercia ya na inventada comunidá de Castilla y León, tuvieron venceyaos a la hestoria d’Asturies.

Nuria Prendes

This work is licensed under a Creative Commons Attribution 4.0 International License.