El mal estáu de les sableres xixoneses nun torga que Xixón se promocione turísticamente al traviés d’un vidiu qu’empondera les nueses costes

El conceyu Xixón vien de presentar el nuevu material audiovisual col que se promocionará la ciudá destacando nelli les numberoses aiciones que  pueden desendolcase nes sos sableres. Nel mesmu nun se respeta siquier la toponimia asturiana, pero polo menos l’apaición de la sidre como atractivu turísticu permite albidrar que la ciudá que se presenta ta n’Asturies.

Los esportes acuáticos son los protagonistes: surf, vela, natación, bucéu, windsurf, piragüismu, moto acuática… aventura a escoyer, pero siempres baxo la vixilancia del serviciu de salvamentu, que’l vidiu nun escaez d’emponderar. L’acesibilidá pa les persones con movilidá reducío, gracies a les nueves silles oruga, ye otru de los puntos fuertes a destacar en Xixón.

P’aprofitar al cien por cien l’alcance mediáticu d’esta campaña ye preciso que se tomen darréu midies pa garantizar la salubridá de les agües marítimes xixoneses, anguañu comprometies polos costantes vertíos d’agües fecales.

Redaición InfoAsturies

This work is licensed under a Creative Commons Attribution 4.0 International License.