Les cais de delles ciudaes asturianes  riscaron güei empapelaes cola nueva campaña d’Andecha Astur na que se reclama la recuperación de la República Asturiana como marcu políticu pal nuesu país

El primer oxetivu d’esta campaña, con cartelos, pancartes, pegatines y camisetes, qu’inclúin los hashtags #YeAsturies #Asturiesnuntienrei #RepublicaAsturiana, ye afalar a la sociedá asturiana pa que’l prósimu 8 setiembre respuenda  a la convocatoria republicana y participe nes movilizaciones entamaes baxo la convocatoria xunitaria fecha pol coleutivu Lluchando pola Soberanía, baxo’l llema de “Asturies nun tien rei”; pero la idega ye que la campaña trescienda l’ocho setiembre y la reivindicación d’una República Asturiana “como un apueste de futuru que garantice la soberanía y el respetu a los drechos individuales y colleutivos del Pueblu Asturianu” continúe siendo visible depués d’esa fecha.

Dientro de la movilización del Díi de la Nación Asturiana, que cunta ya col sofitu d’estremaes fuercies polítiques, sociales, sindicales y culturales col enfotu común d’algamar una República que fine cola  monarquía española, A.A priorizará la reivindicación de la República Asturiana y denunciará’l remanamientu que se fai dende la Corona española de la hestoria d’Asturies.

Nesi sen ‘Andecha Astur tien entamao pal prósimu 6 de Setiembre una Conferencia’l al rodiu de lo que representa Cuadonga como símbolu identitariu asturianu y cómo la monarquía española fai usu d’ella,  “apropiándose d’ún de los principales referentes simbólicos, míticos y hestóricos de la nación asturiana”.

Nuria Prendes

This work is licensed under a Creative Commons Attribution 4.0 International License.