Énte les declaraciones de Genaro Alonso, Conseyeru d’Educación, el pasáu 9 de setiembre rellacionaes coles resultancies de les oposiciones de maxisteriu cellebraes n’Asturies esti branu, SUATEA (Sindicatu d’ensiñantes) fizo un estudiu detalláu de toles especialidaes convocaes, llegando a conclusiones que contradicen a Alonso

Les caberes oposiciones pa puestos públicos de profesoráu vinieron acompangaes de la desixencia per parte de dellos sindicatos -especialmente SUATEA- de que se reconociere’l valor de la esperiencia y se garantizare la estabilidá a los profesores interinos.

El primer datu que se remana son les 450 places que s’ufiertaben, de les que 54 quedaron vacantes (¿?). Nes sos declaraciones Genaro Alonso afirmó qu’ente eses 396 persones que llograron plaza, 336 son interinos, lo que pa él implica que se tuvo en cuenta la esperiencia d’estos, tal comu desixien los sindicatos.

Sicasí, dende SUATEA consideren qu’esta ye una afirmación endemasiao xeneral. Un estudiu más esaustivu afirma qu’el 53% de los aprobaos tienen poca esperiencia: el 21%, denguna esperiencia o de menos d’un añu; el 32%, ente un añu y 8 d’esperiencia. El restu, ello ye, el 47% de los aspirantes tienen 8 o más d’esperiencia. Poro, según el sindicatu, nun ye verdá qu’estes oposiciones facilitaren mayormente l’acesu del profesoráu interín, dándose’l casu de que numberosos interinos n’activu quedaren ensin trabayu de resultes de la rebaremación de les llistes tres les oposiciones.

Pero si daqué llama l’atención son les 54 places ermes, que se reparten en delles especialidaes, destacando Matemátiques (13 places), Hostelería y Turismu (9), caltenimientu de Vehículos (10), etc. El conseyeru fai referencia a que un de los motivos puede ser que nesti modelu d’acesu les distintes pruebes son eliminatories. Ensin dulda, esa ye una de les principales causes y, precisamente pa evitalo, la mayoría d’Organizaciones Sindicales presentes na Mesa sectorial de Madrid propunxeron na negociación llevada a cabu’l cursu pasáu que les pruebes nun foren eliminatories, énte lo que’l Ministeriu d’Educación español amosóse tayante. A ello añeden otros factores qu’enzancaron el procesu y que los aspirantes denunciaron, como la escesiva complexidá de les pruebes práutiques, los criterios de valoración y calificación endemasiao xenerales -colo que los aspirantes nun sabíen a qué atenese-, o la imposibilidá de revisar esames tres de la primer prueba.

SUATEA conclúi de too esto que “Amosóse que’l modelu d’accsu a la función pública docente nun val y que ye imprescindible revisalo de forma urxente, ello ye, primero que se convoquen les oposiciones al cuerpu de Mayestros que se van cellebrar el prósimu añu. Poro, dende los Stes-i demandamos al Ministeriu d’Educación que reabra la negociación d’un nuevu sistema d’acesu de forma inminente”.

Redaición InfoAsturies

This work is licensed under a Creative Commons Attribution 4.0 International License.