Nun exemplu de dignidá y resistencia, los trabayaores sancionaos de Vauste en Xixón permanecieron acampaos un mes enteru frente a la empresa

Más d’un centenar de persones acompangaron ayeri a Nacho y Zape nel fin de l’acampada que calteníen a la oriella l’autopista, delantre de la entrada a Vauste (anantes Tenecco). Los trabayaores permanecieron acampaos como protesta demientres los treinta díes que Vauste Spain los sancionó ensin emplegu nin sueldu pola so participación na denuncia de los costantes ataques de los que son víctimes dientro de la empresa los sindicalistes de la CSI, destacaos pola so llucha por asegurar el futuru del trabayu en Vauste. Nel mes que duró la protesta tuvieron llugar delles concentraciones y cortes de tráficu.

El sindicatu lleva tiempu anunciando el fin de la fabricación d’amortiguadores na planta de Xixón y la falta d’otru proyeutu de futuru viable qu’asegure la continuidá del emplegu pa  los trabayaores. Temen que la empresa, conocía por tar implicada n’otres operaciones utre, mercare la fábrica a Tenecco pa, en finando el contratu que los obligaba a caltener a los emplegaos fasta dientro de mediu añu, desmantelala y vendela, presllando definitivamente. Estes denuncies derivaren en situaciones d’acosu llaboral y daños presonales, culminando con esta sanción.

This work is licensed under a Creative Commons Attribution 4.0 International License.