La Coordinadora Ecoloxista d’Asturies lleva tiempu denunciándolo y agora el FAPAS demuéstralo con datos: el ganao paz n’escombreres contaminaes por arsénicu
Ante la gravedá de los datos, el Seprona –Serviciu pa la Proteición de la Naturaleza asturiana- vien d’interponer la correspondiente denuncia a la Fiscalía de Mediu Ambiente, que deberá determinar si esiste pelligru y si hai indicios de delitu, ya que los animales que pacen nesos tarrenes son destinaos en munchos casos al consumu humanu. L’arsénicu ye consideráu pola Organización contra’l cáncanu como un de los mayores axentes de riesgu pa esta enfermedá.
Los conservacionistes alcontraron valores del metal fasta 140 vegaes perriba de los llegales na esplotación de la mina La Soterraña, onde ye avezao ver vaques y caballos paciendo. Seique lleva 44 años presllada, la que foi la mayor mina d’Europa continúa presentando valores de 5.785 miligramos por kilu, frente a los 40 miligramos permitios. Na mina d’oru de Boinás, n’activu, alcontráronse valores de 78 miligramos por kilu nos llugares onde entren los animales.
Los investigadores nun refuguen la posibilidá de que l’arsénicu llegue al ser humanu al través del agua y de la cadena alimentaria, al consumise alimentos derivaos de ganao espuesto a arsénicu, cuando la inxesta d’esti metal polos animales supera los valores másimos afitaos pa preservar la seguridá alimentaria.
El viceconseyeru de Mediu Ambiente, Benigno Fernández Fano, caltién que nun tien costancia de dala denuncia, derivando responsabilidaes a la Fiscalía española de mediu ambiente. Sicasí, esta nun ye’l primer avisu que recibe’l “Principado” por estos fechos, que ya taben en conocimientu de les autoridaes, ya que un estudiu fechu va cuatro años ya amosó la gravedá de la contaminación na mina La Soterraña, apurriendo unes concentraciones d’arsénicu nel agua que surde de la escombrera de 24.600 microgramos por llitru, siendo potable namás dica los diez. De fechu, esta mina ta nel llistáu de los 12 llugares n’Asturies que tienen aniciáu espediente de declaración de suelu contamináu, ensin que se tomaren midies preventives, dalgunes tan cencielles comu vallar los tarrenes pa torgar el llibre acesu a los mesmos,polo que se denuncia un delitu por omision. De la mina de Boinas nun esiste evaluación de riesgos porque namás s’estudiaron les mines abandonaes.
Llucía F.Marqués
This work is licensed under a Creative Commons Attribution 4.0 International License.
