La ineficiencia alministrativa na tramitación de los permisos pa la realización de meyores n’istalaciones ganaeres fae albidrar intencionalidá a la hora de perxudicar al seutor ganaeru frente a otros

Los retrasos na concesión de permisos van torgando al menos en cuatro ocasiones que les obres necesaries pa recibir ayudes y subvenciones se faigan dientro’l plazu estipuláu, perxudicando principalmente a ganaeros mozos que traten de revitalizar el seutor nuna fastera que prioriza’l turismu. Estos retrasos inscribense dientro’l boicó al furrulamientu de la Casa Conceyu que los funcionarios puestos a déu pol PSOE desendolquen contra l’actual consistoriu.

Nel caberu casu que salió a la lluz, la subvención foi concedía a Javier Cantero y Graciela Martín, ganaeros de Piñeres de Pria, pa la costrución d’una nave agrícola con sistema de cata robotizao, preparada p’acoyer les 60 vaques coles que cuntaben ampliar la so esplotación.

Los trámites pa la edificación entamaron nel añu 2016, con dos años de plazu que finalizaron el díe 14 del presente mes. Un primer retrasu, la obligación de camudar l’altor de la nave, retrasa los trámites direutamente más d’un añu: el qu’entardaron los responsables del conceyu dende que camudaron el proyeutu fasta que-y aprebaron la reforma del mesmu.

Una vegada aprebáu y concluyíu’l periodu d’ información pública ensin que se presentaren allegaciones, son informaos de que l’espediente tien de remitise a la Confederación Hidrográfica del Cantábricu pal so estudiu, porque asina lo desixe la CUOTA. Ensin pescanciar mui bien porque esi trámite nun se realizó al tiempu que los anteriores, esperen con paciencia y en Payares del 2017 reciben la resolución favoratible.

Sicasí, delles baxes llaborales na casa conceyu tornen a retrasar el papeléu, dica Febreru de 2018, cuando reciben l’avisu de que’l proyeutu recibió una alegación de la Escuela d’Arquiteutos. Seique l’allegación fore fuera de plazu, resuelven tamién esi problema.

Nesti puntu falta namás que’l secretariu municipal envie l’informe xurídicu d’implantación a la CUOTA, llabor que-y lleva mes y mediu, nos que los ganaeros acudieron diariamente a entrugar por avance de les xestiones.

Pa rematar, dende otres istancies ayenes al conceyu de Llanes, son informaos de que tol procesu ta estráu d’errores alministrativos, imposibles de subsanar dientro’l plazu previstu. Resultáu: subvención perdida por ineficacia ayena.

El casu ye más grave ainda cuando s’albidra cierta intencionalidá, o comu pocu, cierta desidia intencionada: Javier Cantero informa de la esistencia d’al menos otros tres casos asemeyaos nos que ganaeros que quieren espandir la so esplotación pierden perres por que los trámites nun se faen bien, nin en forma nin en tiempu.

Llucía F. Marqués

This work is licensed under a Creative Commons Attribution 4.0 International License.