Na moción presentada apunta tamién la necesidá de facer un siguimientu del so estáu y mirar pol cumplimientu del deber de caltenimientu de la propiedá

Nel Conceyu de Noreña cunten con una bona amuesa d’horros y paneres que constitúin una parte del padrimoñu asturianu como elementos arquitectónicos tradicionales. En total contabilícense 37 horros y paneres según costa nel inventariu realizáu por Joaquín Noval pal Conceyu. Una bona parte d’ellos, pola so relevancia, atópense recoyíos nel Catálogu Urbanísticu con estremaos niveles de proteición.

Polo xeneral l’estáu de caltenimientu d’estos elementos del padrimoñu etnográficu ye regular y nos caberos tiempos tamos viendo que, por falta d’actuaciones de caltenimientu, tán degradándose dellos, dalgunos inclusive de los protexíos. Sedría’l casu, por exemplu, de la panera de Guerrillero Fombella nº 26 (proteición parcial) o de la panera decorada de Les Cabañes (proteición integral). Amás, esisten otros elementos fuera del catálogu urbanísticu, bien por nun tener inda l’antigüedá necesaria pa la so inclusión o por non cuntar con otros elementos singulares pa faelo magar ello. Ensin escaecer que por tar en mui males condiciones, dalgunos escluyéronse, quedando “restos d’horru” o “restos  de panera”.

Con tou, pesie l’amenorgue na segunda metá del sieglu XX d’esti tipu de construcciones, cuntamos con un nada refalgable conxuntu que ye necesario caltener, con especial atención a aquellos elementos susceptibles yá de proteición. Nesi oxetivu de que Noreña caltenga’l so padremoñu etnográficu ye necesaria la implicación de l’alministración local, aídando y xixilando.

Poro, dende Conceyu Abiertu por Noreña presentóse una moción proponiéndo-y al Plenu afitar unes llínies d’ayuda, neto que fain otros conceyos, pa fomentar que se realicen trabayos de caltenimientu o recostrución. Tamién propunxeron facer un siguimientu del estáu d’horros y paneres pa, si ye necesario, riquir a la propiedá qu’atienda a la so deber de caltenimientu. Con dambes actuaciones puede consiguise frenar la degradación continuo y esmolecedor que carecen dellos elementos, asina como prevenir estes situaciones.

Redaición InfoASturies

This work is licensed under a Creative Commons Attribution 4.0 International License.