La Coordinadora Ecoloxista tornó denunciar énte la Confederación Hidrográfica del Cantábricu les esplumes que lleven viéndose dende va dos díes nel ríu Nalón, nel Valle de Les Caldes, nel conceyu d’Uviéu, de les qu’entá se desconoz la so procedencia

Un nuevu episodiu contaminante foi detectáu nes agües del ríu Nalón, concretamente al altor de les Caldes. Anque’l so orixe nun ta entá determináu, paez bien probable que se deba a una avería o insuficiencia nel sistema de depuración de les agües residuales urbanes, malque nun se refuga una emisión per parte de dalguna de les empreses de la zona. La consecuencies d’estos arramaos algamen tantu a los humanos como a la fauna y flora fluviales y de rivera.

Esti tipu d’arramaos son endemasiao avezaos nos calces asturianos, énte la permisividad de les instituciones col mal furrulamientu de munches depuradores, que se sumen a la contaminación causada polos arramaos autorizaos d’empreses que, según los ecoloxistes, en munches ocasiones emiten más de lo permitío o con condiciones de calidá peores de les autorizaes.

Redaición InfoAsturies

This work is licensed under a Creative Commons Attribution 4.0 International License.