Del 28 al 30 de Setiembre la sidre de copa de tres continentes tien una cita en Xixón, na ochava edición del SISGA, qu’esti añu medra con más llagares internacionales y asturianos, más actividaes y más espaciu na Tastia Abierta al públicu del sábadu 29, na que por 6 euros podrán probase sidres de copa de más de diez países, amás de l’asturiana
De les decenes de certámenes sidreros que se cellebren añalmente n’Asturies, namás el SISGA ta cientráu na sidre non escanciable, ufriendo el más ampliu abanicu a nivel internacional de sidres de copa. Productores de más de diez países tan llonxanos pente sí como los Estaos Xunios, Alemania, Portugal o Xapón aconceyarán en Xixón pa participar nes estremaes actividaes coles que darán a conocer el so productu, qu’añalmente medra’l so consumu nel mercáu internacional. L’alcuentru tamién trata de sí xenerar sinerxíes pente los llagareros, hosteleros ya esportaores participantes, col envís d’ampliar les oportunidaes de mercáu.
Les actividaes entamarán el vienres 28, colos Premios SISGA’18. Durante la mañana d’esi díe aconceyaráse’l xuráu internacional nel Llagar de Castañón para, tres la tastia, otorgar los premios a les meyores sidres en cada categoría. Los premios entregaránse esi mesmu vienres 28 durante la Cena de Gala que se realizará nel restaurante Bellavista de Xixón y que cuntará cola presencia de les autoridaes llocales.
El sábadu sedrá’l die indicáu pa tastiar los productos, na xornada de Tastia Abierta al públicu. El llugar sedrá’l Palaciu de Revillaxixéu de Xixón (Plaza del Marqués, 2) n’horariu de 12:00 a 21:00 hores. La entrada costará 6 euros y con ella apurriráse una copa pa la prebar tolos productos.
El domingo 30 de septiembre tendrá llugar la Xornada de Sumilleres, una tastia de calter téunicu que se realizará de manera interactiva. Cada llagareru presentará estremaes sidres y desplicará los puntos relacionaos col so procesu d’ellaboración, produción, medios de distribución, posibilidaes de mercáu, medios de distribución, comercialización, aiciones de publicidá, de marketing y aceptación pente’l públicu. Asistirán amás enólogos, mayestros bodegueros, chefs y prensa especializada al restaurante El Duque en Xixón.
Esti añu dientro’l marcu del SISGA acudirán a Xixón empreses d’importación/esportación d’E.E.X.X., Xapón, Holanda, etc. que ven nesti eventu una oportunidá única pa conocer de primer man les nueves tendencies del mercáu sidreru y a los propios productores. Así, el SISGA ufre’l el marcu afayaizu p’afitar alcuerdos comerciales a nivel internacional, abriendo el mercáu tamién a los llagareros asturianos.
Redaición InfoAsturies
This work is licensed under a Creative Commons Attribution 4.0 International License.
