El domingu cellébrase’n Grau’l III Díe’l traxe’l país, col envís da-y al nuestru paxellu tradicional el protagonismu que merez porque, dicen los sos organizaores “anque siempre ta presente en toles celebraciones asturianes, ye de xusticia que tenga una fiesta propia: un día pa vistir, llucir y vivir el traxe”.

La idega ye enllenar la villa de Grau con xente vistío con reproduciones de traxes asturianos de la segunda metá del sieglu XIX nuna fiesta de reivindicación de la cultura asturiana na que ver y enseñar la nuestra ropa tradicional.
Les actividaes van arrancar a les once la mañana col espaciu dedicáu a la reciella, Menudu Traxín, con talleres de baille y xuegos pa los piqueños.

A les 12 y media, na Plaza los Dolores de Grau, tendrá llugar Indumentaria 2018: el tercer concursu de traxes tradicionales asturianos, nel que los concursantes podrán participar cola so ropa tradicional de gala o de llabor, siempres que tean iscritos. Un xuráu cualificáu, plural y independiente va repartir 900 euros en premios.

Darréu’l concursu fadráse una Danza na Plaza la Panerina y pa finar, en comiendo, un gran baille na Plaza’l Mercáu con músicos de primera: Herbamora, Leticia González, Santi Galguera y Manolín El de Parres y  Cantaruxare.

Esti díi naz pa que se valoren los traxes tradicionales asturianos, pa esparder el conocimientu de la nuestra ropa tradicional, pa promover la escelencia nel vistir y na confección de prendes tradicionales que son reproducciones de les documentaes na segunda metá del sieglu XIX. Indumentaria quier ser tamién un estímulu y un reconocimientu de les persones que fueron faciendo traxes del país con aciertu y fidelidá a la tradición. Un díi pa sentise arguyosos de nos y de la nuesa ropa.

Llucía F. Marqués