Daréu de la información pública del estudiu d’impautu ambiental pa una cantera de pizarra na llocalidá de Naraido, nel conceyu de Santiso d’Abres, la Coordinadora Ecoloxista presentó allegamientos a esti proyectu mineru oponiéndose a él pol impautu que supondría pa los vecinos de la zona

La CEA denuncia delles irregularidaes nel proyeutu que faen desaconseyable, al so entender, la puesta en marcha del mesmu. Per un llau, denuncien que nun se tien en cuenta lo averao de les viviendes a la esplotación, en dellos casos de menos de 200 metros, ensin que tea previsto nel informe la puesta en marcha de midíes para embrivir el polvu, el ruiu y les vibraciones. Amás de la contaminación y les molesties pa los residentes vecinos a la cantera, nun se refugó’l riesgu de daños nos edificios, causaos poles voladures.

Nel informe tampoco se valora l’impautu de la cantera sobro delles fontes cercanes de suministru d’agua potable, como son Fonte de Saleru, Fonte de Queirotas, y Fonte Pública, al par del Regueru de Naraído, que pola so prosimidá pueden quedar bien afectaes.

L’actividá va desendolcase dientro la Reserva de la Biosfera’l Ríu Eo, Ozcos y Tierres de Burón con un significativu impactu y una clara afeición al paisaxe que nun se tuvo en cuenta y ye preciou cuantificar con más detalle per parte de la minera. Amás, nun ta prevista la recoyida de toles agües de escorrentía del interior de la esplotación y el so tratamientu previu a la so incorporación al sistema de escorrentía natural de la zona, acordies colo que s’afita nos permisos y autorizaciones correspondientes del órganu competente en materia d’agües.

Per otra parte, nel informe nun hai señes de que se realizara una prospeición arqueolóxica afayadiza, por aciu de gueta bibliográfica y visites de campu, nes que s’identifiquen les posibles zones d’allugamientu d’elementos pertenecientes al padrimoñu arqueolóxicu, hestóricu, artísticu y etnográficu del país.

Los vecinos afeutaos nun foron informaos fasta l’últimu momentu del proyeutu mineru, pesi a les consecuencies pa la so salú y pal so padrimoñu, con una perda importante de valor de les sos propiedaes.

Poro, soliciten al “Principado” que, alcordies a los allegamientos presentaos, refugue esti proyectu pol eleváu impautu ambiental que va suponer pa los vecinos de Naraido.

Redaición InfoAsturies

This work is licensed under a Creative Commons Attribution 4.0 International License.