La fuelga xeneral convocada en cuasi tol Estáu finó aina nel restu los territorios, namás n’Asturies miles de muyeres y homes negaronse a tornar ensin más pa casa y decidieron continuar na llucha pa finar cola precaria situación política, económica y social que carecíen, declarando la República Socialista d’Asturies. Foi l’entamu d’una revolución
Nel riscar del 5 d’ochobre de 1934 declarábase n’Uviéu la República Socialista d’Asturies, entantu les fuercies obreres de distinta seña (comunistes, anarquistes, socialistes…) atacaben dellos cuarteles de la Guardia Civil y otros cientros de poder per toa Asturies, amosando’l poder obreru, sobro tou nes cuenques mineres y tola zona centru demientres 15 díes, enantes de que la represión a cargu del gobiernu español fixere cayer tol so pesu represivu sobre’l nuesu pueblu, dexando un saldu de más de 1.200 muertos pente los revolucionarios frente a los 300 pente militares, guardies civiles y guardies d’asaltu. Ensin escaecer la brutal represión posterior, que, sicasí, nun se pue comparar a la qu’hubo tres la Guerra Civil.
Una revolución trunfante y una República Asturiana, aplastada xabazmente pola República española y que tres años dempués declararíase de nueu soberana ya independiente de la mesma.
Nesti 84 aniversariu, como nos anteriores, nun habrá homenaxes oficiales, nin actos en memoria, nin una pallabra de la nuesa hestoria nos llibros de testos: los nuesos fios estudien a los comuneros de Castiella y a los revolucionarios franceses, pero nun saben de los fechos protagonizaos polos sos bisgüelos a la puerte casa. Pesi a la descomanada repercusión nacional ya internacional de la Revolución d’Ochobre del 34, España trata de que s’escaeza la heroicidá del pueblu asturianu. La represión más o menos direuta carecida polos asturianos dende entós (llingüística, cultural, social, obrera…) y la man de fierro cola que se controla dende Madrid tolo que se decide p’Asturies son consecuencies direutes d’esti alzamientu del pueblu asturianu, un castigu col que faen por caltenelu cola tiesta gacha, sumisu ya inorante de si mesmu.
Cabe destacar los paralelismos d’aquellos tiempos colos d’anguañu, salvando les llóxiques distancies, la llamuerga política y la precariedá social y económica, l’ascensu del facismu, la emigración forciada, la falta de xusticia y d’espeutatives de futuru, la dependencia d’Asturies del estáu español… La xunidá del movimientu obreru n’Asturies, la concencia de clas y de la necesidá d’autoxestionase de manera dixebrada al estáu foi clave pa que la revolución tirara p’alantre nel país. Si escaecemos eso, comu pretenden, tendremos perdío’l camín.
Llucía F. Marqués
This work is licensed under a Creative Commons Attribution 4.0 International License.
