Cola marcha de la compañía aerea llusa de Ranón Asturies nun se puede comunicar col restu’l mundiu más qu’a traviés d’España

L’abandonu de la compañía llusa TAP dexa Asturies ensin vuelos fuera d’España pocu depués de que la fuxida d’Easyjet encareciere los costes de los vuelos estatales dica lo inadmisible; la comunicación por mar sigui presllada dende la desapaición del ferry que mos comunicaba con Francia, la llinia de ferrocarril del Correor Atlánticu nun aporta a Asturies y l’autopista del Güerna sigui siendo de peaxe. Un escenariu d’incomunicación por tierra mar y aire que sume a Asturies nun aisllamientu col esterior que torna la importación/esportación nuna opción dificilmente viable pa los empresarios asturianos.

Al mesmu tiempu, les comunicaciones internes siguin siendo abegoses, con carreteres en condiciones llamentables ya un serviciu de ferrocarril insuficiente ya con un ritmu de suspensiones, retrasos y averíes que se resume nel díe d’ayeri: dos averies en 48 hores namás na llinia de FEVE pente Xixón y Candás.

El resultáu ye una Asturies que s’allonxa progresivamente del nivel de desendolcu européu, sumiéndose nuna regresión que mos lleva a condiciones tercermundistes, con consecuencies mui evidentes. La otra noticia del díe completa’l cuadru: 15.735 mozos y moces abandonaron Asturies nos caberos años.

Llucía F. Marqués

This work is licensed under a Creative Commons Attribution 4.0 International License.