Nel homenaxe al pueblu asturianu nel aniversariu d’Ochobre de 34 que tuvo llugar xunto a la tumba del presidente Belarmino Tomás, Marcos A. Fernández, en nome d’Andecha Astur, destacó la necesidá d’un proyeutu de tresformación social que los asturianos puedan sentir como propiu, recalcando la emportancia de trabayar en conxuntu, buscando les llinies comunes y teniendo claro que’l marcu d’actuación ye Asturies

Tornar a poclamar la Republica d’obreros y campesinos d’Asturies. Esi ye l’enfotu de les decenes de persones qu’aconceyaron nel Cimenteriu de Pando, al pie de la tumba d’un de los personaxes más relevantes de la hestoria moderna d’Asturies.

Pa ello echen la vista a aquella Revolución del 34 ya entrúguense comu foi posible qu’esos homes y muyeres,  “los nuesos güelos, xente asturiano, de pallabra, con unes convicciones fixes, xente comprometio pero normal, non superhomes nin supermuyeres”  llevaren alantre un procesu revolucionariu del calibre del que tuvo llugar n’Asturies. “Hai qu’alcordase de que tres meses anantes el PSOE facía informes diciendo que n’Asturies taba too perdio, porque  la mocedá asturiana nun pensaba más que’n beber sidre y dir de romería; tamos falando de la mesma mocedá que protagonizó tres meses depués una revolución . ¿Que lleva a un pueblu a esto? nun foi d’un díe pa otru, hubo un procesu de más de 40 años, una búsqueda de tresforamacion social y xente mui estremao, anarquistes, comunistes, socialistes de munches tribes, republicanos… xunios por un sentimientu común de que la socieda yera inxusta y que la había que tresformar”

Depués de destacar la participación de la muyer asturiana n’Ochobre del 34 y recalcar la importancia de la capacidá d’entendese xente estremao, remembró que’n tol procesu naide punxo en dubia qu’Asturies yera’l marcu específicu d’actuación.

Pa finar, comparó la situación del país entos y la d’agora, que definió comu tan grave o pior, argumentándolo con datos recientes tan respigantes comu que’l 30% de los asturianos nun tienen perres pa mercar les melecines que precisen o que’n menos de diez años la población d’ente 16 y 30 años cayó nun 50% “Foron destruyendo’l texíu socioeconómicu, forciando a la mocedá a emigrar ya faciendo cuasi imposible’l retornu ya’l relevu xeneracional, despoblando Asturies, lo más paecio qu’esiste a un procesu de xenocidiu”. 

This work is licensed under a Creative Commons Attribution 4.0 International License.