Les dificultaes p’aportar a La Escandalera de magar les cincu la tardi, con cortes de carreteres, identificaciones, barreres ya controles policiales torgaron a cientos d’asturianos participar na protesta escontra la Casa Real Española. Sicasí, foron miles los que pudieron deci-yos dende mui cerca que nun se yos quier equí

El manifestamientu y la posterior concentración contra los Premios Principiegos  y la monarquía española recibió a  los convidaos a la gala pente glayíos de “Fuera” “Fartones” “Independencia, puxa Asturies dixebrá” “República asturiana, socialista y soberana”  y otros llemes más encendios como “Guillotina-guillotina”  o “los borbones a los tiburones”. Los xiblíos y abucheos repitieronse ensin descansu les tres hores llargues que pasaron dende l’intre en qu’entamaron a aportar al actu los convidaos y fasta que los asistentes al mesmu salieron, con momentos d’especial tensión cuando los reis (protexios de los abucheos pola barrera de seguridá y los cientos de gaites) aportaron al teatru.

La mayor novedá respeutu otros años ye’l fechu de que la concentración nun pasó desapercibía nos medios de comunicación, comu puede apreciase nel recorte de  prensa que se ve a la manzorga, na qu’unos reis en tensión faen como que nun se decaten de lo que pasa a les sos espaldes.

L’avezáu silenciu col que se tapecía la refuga del Pueblu Asturianu a la monarquía dexó pasar esta vegada tomes aéries de la concentración, semeyes cola asturina y la española republicana de fondu y fasta imáxenes en primer planu de la protesta, tantu na prensa y televisión nacional comu internacional.

Per otru lláu, les disposiciones policiales coles que torgar l’afluencia a la concentración foron aún más dures, ampliando’l perímetru, realizando identificaciones ya impidiendo el pasu a munchos manifestantes.

Esta concentración dase nun añu especialmente marcáu pol puxu que tan garrando los movimientos pola República Asturiana y escontra la monarquía española. Pente les aiciones entamaes nesi sen nos caberos meses destaquen La marcha repúblicana del 8 Setiembre, na que participaron más de venti organizaciones, les reclamaciones republicanes nos homenaxes a los heroes d’Ochobre del 34 y de la guerra civil, la campaña “República Asturiana” d’Andecha Astur, la refuga de los meyores estudiantes a presentáse a los reis, les pancartes y pintaes perdayuri, pero especialmente nel Mirador de la Reina y la reciente propuesta que llama a los conceyos asturianos a declarase republicanos, negándose a participar en receiciones oficiales, facer gastu públicu pa publicidá o  actos monárquicos y retirando los nomes alusivos a la monarquía borbónica de les sos cais.

Nuria Prendes