La noticia de que Balearia retomaría l’autopista la mar foi espublizada poles autoridaes portuaries de El Musel va cerca de dos selmanes, pero la empresa nun confirmó la noticia dica güei, ya que venceyaba la so aceutación de la ruta a la concesión de delles subvenciones que vendríen a sumase a les qu’apurre la Xunión Europea.

Seique agora ta confirmada, non solo la empresa concesionaria del trayeutu, sinón tamién el barcu que va facelu (el Sicilia) nun se prevé que los viaxes entamen dica l’añu 2020, ya que’l barcu va ser remotorizáu pa que pueda navegar usando gas natural comu combustible. Esta fecha entra xusto nel plazu concedíu pola Comisión Europea pa tornar a poner en furrulamientu la conesión marítima pente los puertos de Xixón y Nantes-Saint Nazaire, que fina en Xunetu de 2011.

La subvención de la XE dirá destinada a la remotorización cinco buques, pente los que s’alcuentra el Sicilia, una embarcación de 186 metros de eslora y una velocidá másima de 23 nuedos, con una capacidá de tresporte de 950 pasaxeros, 75 coches y unos 120 camiones. Amás, el “Principado”, el Conceyu de Xixón y Puertos del Estado algamaron un pautu pa sofitar esti proyeutu, nel que  l’estáu  ya el “Principado” apurrirán el 40% ca un mientras que el Conceyu Xixón asumirá el 20% restante.

En concretu, los Presupuestos xenerales del Estáu prevén una partida en reserva de 1,6 millones d’ euros pa invertir na autopista de la mar y el “Principado” comprometió una aportación de 300.000 euros nos dos primeros años.

El preslle nel añu 2014 de la conesión pente Xixón y Nantes foi llaceriosa pa dar salida a mercancies estratéxiques camín d’Europa, pero amás, cola so desapaición presllábase la posibilidá de convertir Xixón nun importante cientru lloxísticu pel que pasaben los tresportistes vinientes de Portugal y España.  La recuperación de la mesma ye especialmente urxente na actual situación d’aisllamientu que carez Asturies, reactivando la xunión con una zona xeográfica, venceyada comercial, hestórica y culturalmente al nuesu país

Nuria Prendes