Según l’Estudiu sobro comedores escolares y compra prósima” realizáu por CEAPA, el preciu mediu del menú escolar n’Asturies ye’l más baxu del estáu, 3,50 euros por neñu; nesti preciu inclúyense los salarios de cocineros y curiaores, el tresporte, los impuestos, los seguros y les istalaciones, colo que lo que queda llibre pa la comida ye un euru escasu por díe y neñu
N’Asturies sírvense unos 10.000 menúes escolares tolos díes, de los que comen tantu los menores que, por falta d’ingresos familiares, recibieron la beca de comedor y pa los qu’esta ye en munchos casos la principal comida del díe -cuando non la única- comu aquellos que los sos pas nun pueden recoyelos nel colexu a la de la comida y opten por esti sistema de conciliación.
Teóricamente, los menús de los colexos, ellaboraos por nueve empreses de catering estremaes, afáense a la “Estratexa Naos pa la nutrición, actividá física y prevención de la obesidá”, que desixe unes cantidaes mínimes de carne y pexe fresco dos díes a la selmana, fruta cuatro díes, pasta y arroz, con productos que tienen de presentar unes condiciones mínimes garantizaes al traviés d’ispeciones sospresa.
Sicasí los pas y mas de numberosos colexos protesten pola falta de calidá de los menúes que reciben los neños asturianos. “los alimentos vienen ultraconxelaos non pasteurizaos, crudos, non cocinaos n’orixe como desixe’l pliegu, escasos raspiando la miseria (nun hai fruta pa toos!), en condiciones d’almacenamientu vergoñoses, con tastos estraños, enllenos de conservantes pa qu’aguanten una selmana y dos y les que faiga falta y mil coses más, de les que nun quieren sentir falar.” llamenten dende’l colexu La Ería, n’Uviéu. Les protestes dende Xixón son asemeyaes “los neños quexense de que los alimentos sírvense de cutiu ensin desconxelar bien, les cantidaes son tan escases que n’ocasiones pártense les hamburgueses pente dos neños, el pexe acostuma a ser panga (el de peor calidá del mercáu, de bien dudosa salobridá)… Amás, les cuidadores nun son profesionales y el so tratu a los neños dexa enforma que deseyar”.
La situación nun ye la mesma en toa Asturies, destacando como exemplu a siguir el colexu de San Antolín de Ibias, que cunta con comedor y cocina de xestión propia onde s’ellaboren unos 70 menúes al díe, aprofitando productos llocales siempres que ye posible, tanto p’aforrar como pa garantizar la so frescura y sofitar a la economía del conceyu.
Por tou ello n’Uviéu, onde denuncien que les ispecciones de calidá les fae la mesma concesionaria qu’ellabora los menús, entamaron una recoyida de robles na que piden que tolos conceyales del Conceyu d’Uviéu coman mientres un mes el catering que se da a los neños nos colexos.
Llucía F. Marqués
This work is licensed under a Creative Commons Attribution 4.0 International License.
