Pola mor de los 8 años de doblaxe profesional n’Asturies la EDAS va perfacer un programa d’actividaes a desendolcar mientres los vinientes payares, avientu y xineru. Nél van figurar alcuentros con actores y actrices de doblaxe de renome, charres, proyeiciones, aiciones formatives abiertes, una xornada sobre empresa y doblaxe y el sortéu de places en dalgunos de los talleres correspondientes a l’axenda de los meses citaos
El 7 d’agostu de 2010 la prensa anunciaba la realización en Xixón del doblaxe primeru d’un llargumetraxe, el clásicu del cine de terror “Night of the living dead” (Georges A.Romero). Producíu y dirixíu por Illán Gonzali, per aciu la so empresa Gonzali Producciones. Con esta iniciativa Illán Gonzali, n’actualidá direutor de la Escuela de Doblaxe de Asturies® (EDAS) y de Wadjet Media®, abría camín per vez primera al doblaxe profesional n’Asturies, llogrando en 2013 l’aniciu d’ésti na TPA.
Dende entós foi’l responsable de numberosos trabayos nesta estaya, tanto pa vidiu como pa televisión. Ente otros podemos mentar los doblaxes de Gulliver’s Travels (2010), The Third Man (2011), McLintock (2011), Popeye, trés capítulos (2011), Night of the living dead, edición especial para DVD (2012), One-eyed Jacks (2013), Fleischer & Famous Superman, nueve capítulos (2014), Dirty Harry (2015), Inception (2016), And then there were none (2016), Woody Woodpecker: Pantry Panic (2016), Ocean’s eleven(2017) y Sherlock Holmes: A game of shadows(2017).
Illán Gonzali foi tamién pioneru na enseñanza del doblaxe, colos cursos qu’entamó na Universidá Popular xixonesa, faciéndose’l primeru d’éstos del 6 al 17 d’abril de 2015. Más alantre crea la Escuela de Doblaje de Asturias®, propuesta formativa profesional única nel nuesu país, onde tienen collaborao como profesores invitaos los actores Claudio Serrano (Ben Affleck / Batman), Fernando Cabrera (Sheldon Cooper / The Big Bang Theory), Isacha Mengíbar (Lisa Simpson), Carlos Ysbert (Homer Simpson), Alex Saudinós (voz del personaje Bob Esponja), Jorge Saudinós (Oliver Atom / Oliver y Benji), Juan Perucho (Peter Griffin / Padre de familia) y Jesús Pinillos (Leonard Hofstadter / The Big Bang Theory). Anguañu cuenta con Javier Roldán como direutor de varios cursos.
Redaición InfoAsturies
This work is licensed under a Creative Commons Attribution 4.0 International License.
