Esta tardi a les 19:00 hores, nel Atenéu de la Calzada (Xixón) tendrá llugar el Conceyu abiertu de la Plataforma contra la Contaminación de Xixón, que nesta ocasión ufrirá una interesante charra-alderique
Félix Payo Losa, mélicu neumólogu especialista xubiláu nel serviciu de fisioloxía respiratoria del Istitutu Nacional de Silicosis, sedrá l’encargáu d’abrir el conceyu con una conferencia entitulada “Les partícules el aire qu’alendamos: comu influin na nuesa salú”.
Darréu abriráse un alderique alrodiu’l tema pa finar el conceyu cola valoración conxunta de les nueves aniciatives que se proponen poner en marcha na so griesca por un aire llimpiu nel conceyu.
La cuestión cientral que se tratará son los sistemáticos incumplimientos de la normativa que presenta la estación movil de El Lloredal, nel barriu de La Calzada, ún de los más afeutaos polos problemes de polución.
La Plataforma convida a acudir a tolos que ten enfotaos en conseguir un aire más sanu y remembren que “esti mesmu domingu, fasta lloviendo, subió la contaminación un 390% de Oeste a Este de Xixón”
Arriendes d’ello conviden a visitar la esposición «Imáxenes contaminaes», una istalación del asturianu Óscar Parasiego nel que s’amuesa Xixón dende l’aire y que pue vese esti mes en LlABoral; nella l’autor visibiliza los contaminantes ambientales con datos y escenarios reales mediante una aplicación informática.
Nuria Prendes
This work is licensed under a Creative Commons Attribution 4.0 International License.
