Esti añu el repartu de la Renta Social, el sistema que cubre en Xixón les necesidaes más básiques de los ciudadanos, convirtióse nuna humildante carrera de velocidá

Diez de la mañana, segundu díi de la presentación de la documentación pa solicitar la Renta Social, diez de la mañana nel Atenéu de La Calzada. Una muyer saca’l númberu 328. Persabe que nun tien opciones: hai fondos pa les 300 primeres tarxetes y un cálculu rápidu apunta a que ya van más de 5.000 solicitudes. Ye fácil, 9 cientros de presentación de documentos, a un mínimu de 600 solicitudes diaries indiquen que pa esa hora llevaránse alrodiu de 8000 pidiciones. Sicasí, espera. Tres hores d’espera ensin esperanza, por si quedare dalguna posibilidá: de que s’amplíe’l presupuestu, de que se aplique’l xacíu y se dean les perres a quien más lo necesita, que nun tien porque ser el más rápidu, de que surda’l millagru y pueda vestir a los fíos tamién esti añu.

Humildante, frustrante, una tomadura de pelu a quienes peor lo tan pasando, eses son dalgunes de les espresiones utilizaes tantu por Andecha Astur comu por Podemos Xixón pa definir esta situación.

Dende Andecha Astur desixen que se camude darréu esti sistema y s’aplique un repartu xustu de la Renta Social, pero sobro tou que se trabaye p’amenorgar la cifra de persones que la necesiten “Lo que nun tien xacíu ye perpetuar una situación na qu’al menos ún de ca venti ciudadanos vive’n riesgu d’esclusión social y probitú.” declaró  Llucía Fernández, en representación d’Andecha “denunciamos la situación de precariedá na que viven miles de persones a les que nun se-yos ufre oportunidá de salir d’esti bucle de dependencia y desiximos la puesta en marcha de midies de creación d’emplegos dignos que faigan innecesario medrar la dotación económica pa fines sociales”.

Entantu, dende Podemos denuncien la situación carecida polos solicitantes de la Renta Social “Cuando los drechos de la ciudadanía se convierten en “el primeru que llegue pa elli”, xenera situaciones vergoñoses y humildantes pa les families xixoneses”.

La muyer de la nuesa hestoria al final torna pa casa con un papel robláu y la vaga promesa de qu’una futura convocatoria, l’añu que vien, cubra les necesidaes d’otros pocos. ¿Y esti añu? ¿esti añu van los neños descalzos?.

Nuria Prendes

This work is licensed under a Creative Commons Attribution 4.0 International License.