Un filu de facebook recueye más d’un centenar d’insultos n’asturianu nuna hora pa demostra-y a Casado el dominiu públicu de la llingua y los asturfalantes salten a les redes col tweet #yofaloasturianu

Falanbaldre, manguán, babayu, gochantón, atopéu, rancayu, carañocla, ferrocotón, cagapraos, boborolu, mastuirzu… y asina fasta 107 amueses de la bayura y orixinalidá de la llingua asturiana que dexen nidio’l dominiu que los asturianos tienen de la llingua de so, evidenciando un de los dos errores caltenios nes declaraciones feches pol presidente del PP, Pablo Casado, cuando dixo que’l PSOE quier «imponer el bable que nadie habla en Asturies».

Pa completar la rempuesta de los asturianos a les sos declaraciones, el tweet #yofaloasturianu recueye los testimonios de centenares d’asturfalantes esmolecios por revindicar la so propia esistencia y face-y ver al Sr. Casado el so enquívocu.

Remembramos-y que alcordies el caberu Estudiu Sociollingüísticu sobre la llingua asturiana, desendolcáu pol profesor y direutor del Euskobarómetro, Francisco Llera Ramo, el 90% de los encuestaos asegura poder usar l’asturianu, y fasta un 62% de los asturianos defínene como falantes.

L’otru erru del presidente del partíu popular ye’l de dar al PSOE  el méritu de posicionase, ya non comu defensores, sinon incluso comu “impositores” del asturianu.

Nada más lloñe de la realidá.

Nuria Prendes

This work is licensed under a Creative Commons Attribution 4.0 International License.