El ministru español de Fomentu, Jose Luis Ábalos, vien d’anunciar como bona noticia l’abandonu del proyeutu de recuperar la rampa de Payares y la refuga a dotar con anchu internacional los dos túneles que traviesen perbaxo’l cordal

L’anchu ibéricu, de 1668 mm pente les cares internes de los carriles, ye carauterísticu de la Península Ibérica, onde esti anchor, superior al internacional, ta presente na práutica totalidá de les víes férrees. Hestóricamente esta desemeyanza cola rede ferroviaria europea vien demostrándose un grave problema que torga les relaciones económiques pente los que caltienen un anchu y otru, forciando trasbordos nes fronteres y cortando les comunicaciones por ferrocarril con Europa.

Dende Andecha Astur consideren qu’al non adautar les nueves víes del Payares a esti anchu internacional, enterrando l’alcuerdu algamáu nesi sen va años, condérgase a Asturies a continuar careciendo estos problemes indefinidamente, perdiendo una oportunidá de francer la incomunicación na que’l país s’alcuentra somorguiáu. “Col anchu ibéricu en cuentes del internacional, el Reinu d’España hipotecamos el futuru de nueu. Otros dos sieglos de retrasu en comunicaciones, eso ye lo que quien”.

Nuria Prendes

This work is licensed under a Creative Commons Attribution 4.0 International License.