Na víspora del Díi internacional de Solidaridá con Palestina llantaráse una olival nos tarrenes del antiguu HUCA d’Uviéu
El xueves 29 ye, de magar el 1977, el díi que la Organización de les Naciones Xuníes reserva pa dedicar al pueblu palestín. N’Asturies la cellebración alántrase un pizcu y les actividaes coles que se quier llamar l’atención sobro la gravísima situación que vive’l pueblu palestín entamen güei mesmo, a les siete la tardi, cola charra entitulada ‘Gaza güei. ¿De la velea a la esperanza?’, na Biblioteca Pública del Fontán d’Uviéu. La charra correrá a cargu de l’activista hispano-palestina, Jaldía Abubakra (Gaza, 1967), del Movimientu de Muyeres Palestines Alkarama ya integrante de BDS, que promueve el Boicó, la Desinversión y les Sanciones a Israel. Participó nes aiciones de Muyeres rumbo a Gaza y ye collaboradora de la Flotina de la llibertá.
Amás, el miércoles 28 de Payares a les 12
del meudíi, colocaráse una placa comemorativa y llantaráse una ‘Olival de la memoria” nel Parque del Truébanu, nos terrenos del antiguu HUCA d’Uviéu. L’olival, l’árbol más emblemáticu de Palestina, ta careciendo agora l’ataque d’Israel que sistemáticamente estroza estos árboles, importantes tanto pol so valir ecolóxicu ya económicu comu pol so sinificáu como símbolu de la resistencia palestina. Con esti árbol Uviéu xúnese a Xixón, Llangréu y Avilés, ciudaes que ya tienen les sos respeutives olivales, llantaes nel Díi la Tierra Palestina, el 30 de marzu.
Nel actu tarán presentes Jaldía Abubakra, la plataforma vecinal SOS-viejo-hospital, el CSCA, el Conceyu d’Uviéu y la Coordinadora asturiana de ONGd. La placa que se colocará xunto a la Olival recoyerá un poema de Naomi Shihab Nye:
Naide recibe yá nin una postaluca
d’aquel llugar d’allá alantrones, acullá de la mar.
Naide siente de nueche llegar los soldaos
a arrincar la oliva del so sueñu tebiu.
Esmesar raíces. Nun ye noticia de primer plana
nel to país nin nel de mio.
NAOMI SHIHAB NYE
Nuria Prendes
This work is licensed under a Creative Commons Attribution 4.0 International License.
