Ayeri manifestáronse’n Llangréu ya’l vienres fadránlo en Morea d’Ayer: los usuarios del ferrocarril asturianu denuncien el desdexamientu del serviciu, nel que ven un claru intentu de privatización o una busca del so preslle
Los sucesivos cortes de serviciu, les averies, los tresbordos y retrasos nun yeren abondo pa matar la llinia de ferrocarril a Llaviana y los 421 pasaxeros que, de media, usaben esti serviciu nun dexaben de facelo, asina qu’ADIF decidió cortar polo sano y eutanasiar la llinia con un corte de tres meses depués del que va ser abegoso recuperar la vecería. La esculpia, unes obres que lleven pendientes dende’l branu y que podríen facese de nueche, calteniendo de díe’l serviciu.
Los vecinos de Llangréu nun tan d’alcuerdu con ello: el ferrocarril ye más rápidu y más baratu que’l mesmu trayeutu na opción que yos queda: l’autobús. Amás, el tren tien más paraes y la so desapaición dexa a poblaciones ensin dala comunicación.
Poro, desixen a Fomento que recule y frene el corte del tramu El Berrón-Llaviana programáu pal un d’avientu y col que 42 trenes (30 los díes festivos) dexaríen de circular diariamente dica’l 28 de febreru y pa ello cientos de persones conentráronse ayeri tardi, en Llangréu, convocaos pola Plataforma Ciudadana pol Soterramientu Ferroviariu, cortando’l tráficu por carretera y aprofitando pa pidir el soterramientu. Tiénenlo claro: esti preslle nun ye más qu’otra midida empobinada a la desapaición del serviciu o la so privatización “Tan a la gueta d’escuses pa presllar la llínia o privatizala” y pa ello van tornando, pali que pali, a la llinía d’anchu métricu que más viaxeros movía n’Asturies nuna llinia marxinal. Ya en xunetu se recoyía una cayida del 50% nel númberu de viaxeros, por mor de la ineficiencia del serviciu.
Pel so lláu, los trabayaores d’Adif y Renfe, que s’enteraron del preslle pola prensa ya que nun foren avisaos del inmiente fin del so puestu, afirmen qu’hai personal na compañía pa facer los trabayos de refuerciu del tunel de Carbayín de nueche, calteniendo el tren de díe, como se fae d’avezu nestos casos “y sinon, que se contrate”. A la situación actual aportóse por falta d’un correchu trabayu de caltenimientu y planificación, pudiendo tar iguao de mayar el 2016, cuando ya tuvo preslláu durante seis meses el tramu pente Tuilla y Llaviana por obres na estación de Llangréu.
Per otru lláu y na mesma llinía de denuncia ciudadana de la situación d’abandonu y deterioru de los trenes asturianos, los vecinos d’Ayer convoquen a una movilización en defensa del serviciu de ferrocarril na llinia Baiña-Col.lanzo, cuasique centenariu y tamién en pelligru de desaniciu.
L’actu sedrá el díe 30 de Payares a la una y media, na Estación de Morea d’Ayer.
This work is licensed under a Creative Commons Attribution 4.0 International License.
